26 От ыйа 26.07
  • 23°
  • $ 85,41
  • 93,17

Аграрнай баартыйа 6 туонна көмөнү Уус Маайаҕа ыытар

19:56, 17 мая 2018
Текст:
Читайте нас на
Яндекс Новости
ЯДВ

Аграрнай баартыйа Саха сиринээҕи салаата (сал. Александр Васильев) 6 туонна кэриҥэ бородууктаны, сүөһү сиир комбикорматын халаантан эмсэҕэлээбит Уус Маайа нэһилиэктэригэр анаан бэлэмнээтэ.

Манна сүрүннээн Дьокуускайдааҕы көтөр фабриката, килиэп кэмбинээтэ, Хатастааҕы сибиинньэ иитэр комплекс, “Якутия” ФАПК, “Сайсары” бааһынай ырыынага, “Тимин” ХЭТ, “Туймадаагроснаб”, “Сахаагропродукт”, “Туймаада” ФАПК курдук бөдөҥ тэрилтэлэр көмөлөстүлэр.

Билиҥҥитэ бу көмөнү кэмигэр тиэрдэргэ анал бөртөлүөт көтөрүн туруорсаллар. Тоҕо диэтэххэ, ыксаллаах быһыы-майгы балаһыанньата уһулуннаҕына, бөртөлүөт көппөт, оччотугар уунан ыытарга уһаан-тэнийэн хаалар, көмө хойутуур.

 

Баартыйа толорор кэмитиэтин салайааччы Прокопий Старостин бу курдук кэпсээтэ:

Биһиги бу биирдэ көмөлөһүүнэн эрэ муҥурдаммаппыт. Халаантан эмсэҕэлээбит Амма, Таатта, Хаҥалас, Чурапчы улуустарыгар тугунан көмөлөһөрбүтүн тобула сылдьабыт. Холобур, сибиинньэ оҕотун таһааран түҥэтиэхпитин сөп. Биһиэхэ 2640 чилиэннээхпит, билиҥҥи туругунан, баартыйа чилиэннэрэ бары ким төһөнү кыайарынан, харчы хомуйа сылдьаллар.

Ону тэҥэ Арассыыйатааҕы бааһынай хаһаайыстыбалар, кэпэрэтииптэр ассоциацияларын Саха сиринээҕи салаата (сал. Александр Артемьев) өрөспүүбүлүкэ үрдүнэн хаһаайыстыбалары, кэпэрэтииптэри түмэн, көдьүүстээх көмө оҥорорго үлэлэһэр.

Үлэ, дьиҥэ, саҥа саҕаланнаҕа. Сайыны быһа чөлүгэр түһэрии үлэтэ ыытыллар буолуохтаах. Онон тыа сирин дьонун кыһалҕаларын өйдөөн, ыарахан кэмнэригэр көмөнү оҥоруох, биир да киһи туора турбакка, сомоҕолоһон, бэйэбит кылааппытын киллэриэх тустаахпыт.

Ону тэҥэ, бырабыыталыстыбаҕа бэйэбит этиилэрбитин киллэрдибит. Холобур, дьиэлэрэ ууга барбыт дьон устудьуон оҕолоох буоллахтарына, үөрэхтэрин эрдэ түмүктээн, истипиэндьийэлэрин биэрэн, суолларын ороскуотун төлөөн, дойдуларыгар ыыталларын курдук. Оччотугар дьонноругар тиийэн көмөлөһүө, үлэлиэ этилэр буоллаҕа. Ону тэҥэ анал биригэдээлэри ыытарга, тутар этэрээттэри тэрийэргэ этии киллэрэбит. Онно астарын-үөллэрин хааччыйарга үлэлэһиэ этибит.

Амма диэни иһиттибит да, волейболу саныы түһэбит. Ол иһин куоракка волейбол марафонун ыытар баҕа баар. Холобур, 24 чаас устата хамаандалар волейбол оонньууллар, элбэх киһи көрө кэлэр, киирии босхо, ким баҕалаах анал дьааһыктарга харчы угаллар, ол үп Амма улууһугар ыытыллар. Толкуйдуу сылдьабыт, ханна да итинник марафон ыытылла илик. Онон биир дойдулаахтарбытын ыксаллаах балаһыанньаҕа түмсүөҕүҥ, кыах баарынан көмөлөһүөҕүҥ диэн ыҥырабыт.

Аграрнай баартыйа бары көмөлөспүт, көмөлөһө сылдьар дьоҥҥо, тэрилтэлэргэ махталын биллэрэр.

Ангелина Васильева, “Саха сирэ” хаһыат, edersaas.ru

0

0
Следите за самым важным и интересным в Telegram-канале и WhatsApp-группе ЯСИА