Дьокуускайга Арктикатааҕы судаарыстыбаннай агротехнологическай университекка 50 устудьуон «пилота суох авиационнай систиэмэлэр оператора» (муҥутуур көтөр ыйааһына 30 киилэҕэ тиийэр) идэни баһылыыллар.
Үөрэтии дойду бастыҥ профильнай үрдүк үөрэҕэ П.А. Столыпин аатынан Омскайдааҕы судаарыстыбаннай аграрнай университет өйөбүлүнэн «Пилота суох авиационнай системалар» национальнай бырайыак чэрчитинэн ыытыллар. Теоретическай чааһы уонна киирии куурсун Омскайдааҕы ГАУ базатыгар онлайн киэбинэн аастылар, онтон алтынньы 2 күнүттэн устудьуоннар Арктикатааҕы ГАТУга иһиттэн практическай дьарыкка киирдилэр.
«Билигин оҕолор көтөр симулятордарыгар салайыы үөрүйэхтэрин үөрэтэллэр, оттон балачча бэлэмнээх дьон дьиҥнээх FPV -дроннарга эрчиллиилэргэ көстүлэр. Истээччилэр бары үөрэххэ олус эппиэтинэстээхтик сыһыаннаһаллар уонна беспилотниктары туруоруу уонна хааччыйыы ымпыгар-чымпыгар улаханнык интэриэһиргииллэр», — диэн кэпсээтэ бөлөх салайааччыта, Омскайдааҕы ГАУ геодезияҕа уонна дистанционнай зондировкалааһыҥҥа кафедратын доцена Александр Гарагуль.
Практическай үөрэхтээһин чэрчитинэн устудьуоннар эрдэттэн оҥоһуллубут сорудаҕынан мультисплектральнай аэрохаартысканан устааһыҥҥа « Геоскан Gmini » пилотнай комплекса үлэҕэ киирдилэр. Технология тыа хаһаайыстыбатыгар ыһыы туругун кэтээн көрөргө солбуллубат көрүҥ буолар.
Беспилотниктары араас эйгэҕэ көхтөөхтүк туһаныллаллара бэлиэтэнэр, оттон Арктика регионнарыгар кинилэр суолталара өссө улахан. БАС тыа хаһаайыстыбатыгар, геодезияҕа уонна картографияҕа, дистанционнай зондировкаҕа туттуллар.
Бу эйгэҕэ квалификациялаах оператордарга ирдэбил сылтан сыл улаатан, Арктическай ГАТУ бырагырааматын бүтэрээччилэр Саха сирин уонна РФ Арктическай зонатын экономикатын дьиҥнээх секторыгар ирдэниэхтэрэ.
