Россияҕа Почта күнүн көрсө Кэбээйи улууһун Сангаардааҕы почта салайааччыта Афанасий Полятинскай дойду бастыҥ почта таһааччытын аатын ылла. Бу туһунан СИА иһитиннэрэр.
Былырыын Афанасий Полятинскай 100 киилэ кэриҥэ почта таһаҕаһын уонча күн устата Сангаартан сатыы, Кэбээйи улууһун ыраах сытар нэһилиэктэригэр тиэрдибитин туһунан сурах, дойдуну биир гына иһиллибитэ. Кини быһа холоон 350 км сири барбыта.
Бу сурах суола суох хаалбата. Быйыл Россия почтатын күнүн көрсө Афанасийга — дойду бастыҥ почтальонугар «Сыл киһитэ» диэн ааты иҥэрдилэр уонна статуэтка туттардылар. Наҕарааданы Россия Почтатын салайааччыта Максим Акимов бэйэтинэн туттарда. «Бу кэбээйилэр кыттыгас ситиһиибит буолар. Нэһилиэк баһылыктарыгар, миэхэ көмөлөспүт дьоҥҥо махталбын тиэрдэбин», — диэн Афанасий Полятинскай үрдүк сыанаттан эттэ.
Россияҕа почта күнэ 1994 сылтан от ыйын иккис өрөбүлүгэр бэлиэтэнэр. Былырыын дойду бастыҥ почтальонунан Осетия Бурон бөһүөлэгин үлэһитэ Екатерина Отараева буолбута.
This post was published on 14.07.2020 11:01 11:01