Абый улууһугар, муус устар 6 күнүнээҕи туругунан, уопсайа 275,9 туонна сиир астара тиэрдилиннэ, ол иһигэр 82,1 тн от, 121,4 тн сенаж, 72,4 тн сүөһү эбии аһылыга.
Тыа хаһаайыстыбатын министиэристибэтин өйөбүлүнэн 150,8 тн от Чурапчы, Амма, Томпо улуустарыттан Абый, Майыар нэһилиэктэригэр уонна Оттоох Атах учаастагар кыһыҥҥы суолунан тиэрдилиннэ. 23,8 тн от Орто Халыматтан Уолбут нэһилиэгэр эбии айаннаан иһэр. Уолбут бөдөҥ хаһаайыстыбата (ИП Шкулева С.Ю) бэйэтин кыаҕынан Бүлүү улууһуттан 50,4 т сенаж атыылаһан аҕалла.
Улуус дьаһалтатынан уонна хаһаайыстыбалаахтар бэйэлэрин күүстэринэн уопсайа 72,4 тн сүөһү эбии аһылыга аҕалылынна, ол эбэтэр уотурба, эбиэс, туус.
Бу күннээҕи туругунан сүөһү аһылыгын саппааһа 677,2 тн. хаалла. 594 төбө сылгы эбии аһылыкка турар. Улуус үрдүнэн 47 ньирэй, 2 кулунчук төрөөтө, диэн суруйда «Хотугу кыым» хаһыат бэйэтин МАХ-ханаалыгар.
