Икки тыһыынча кэриҥэ киһи олорор Белая Гора бөһүөлэгэр муус устарга олохтоох культура дьиэтигэр киинэ саалатын үлэҕэ киллэриэхтэрэ. Бу Абый оройуонугар «Экстра Синема» ситим бастакы киинэ уонна саха Арктикатыгар тохсус киинэ кыһата буолуоҕа.
«Экстра Синема» хампаанньаҕа тиэхиньикэни кыһыҥҥы суол сабыллыан иннинэ ыларга суоттаналларын иһитиннэрдилэр. Киинэлэри көрдөрүүгэ, муус устар ыйга биир кэлим автоматизированнай информационнай системаҕа (ЕАИС) регистрацияланан баран, билиэттэри дистанционнай атыылаһыыны олохтуур былааннаахтар.
Электроннай билиэт системата «СберАфиша» киинэ саалатыгар босхо бэриллэр. Системаны киинэ сеанстарыгар эрэ буолбакка, атын тэрээһиннэргэ, ол иһигэр «Пушкин картатынан» билеттэри олоххо киллэрэргэ эмиэ туһаныахха сөп.
«Бу кыаҕы Минарктика бэрэстэбиитэллэриттэн биллилэр. Онтон Муома оройуонуттан кэлбит коллегаларын кытта көрүстүлэр, онно «Экстра Синема» киинэ сылтан 2024 сылтан үлэлииллэр. Киноплатформа үлэтин, техническэй туһаларын туһунан үтүө сыанабылы ылбыппыт. Онтон оройуон дьаһалтатын кытта кулуупка оборудованиены олохтуурга быһаарылынна — тыа сиригэр киинэ сеанстарыгар наадыйыы баар. Өссө культура киинин маҥнайгы этээстэрин тэринэр былааннаахпыт — атыы-эргиэн точкатыгар урбаанньыттарга миэстэ оҥоруу», — диир кулууп директора Павел Семенов.
«Экстра Синема» хампаанньа прокатын отделын салайааччыта Николай Егоров 2026 сылга күүтүллэр премьералар элбэх ахсааннара бырайыакка оборудованиены кылгас болдьоххо төлүүллэригэр көмөлөһөрүгэр эрэллээх. «Оборудование сыанатын уонна киинэ дохуотун тэҥнээтэххэ, оборудование ороскуотун балачча түргэнник төлүөххэ сөп. Итинник кейстэр номнуо бааллар – холобур Нам улууһун Нам уонна Аппааны сэлиэнньэлэригэр киносаалалар прокатка 2 мөлүйүөнтэн тахса солкуобайы хомуйан култуура дьиэлэрин сайыннарыыга үбү-харчыны ыыталлар», — диэтэ Николай Егоров.
Санатан эттэххэ, республикаҕа 79 «Экстра Синема» киинэ саалата үлэлиир, онтон 8 Саха сирин Арктикатын оройуоннарыгар. Дойду Президенэ Владимир Путин сорудаҕынан «Экстра Синема» саха бырайыага «Дьиэ кэргэн» национальнай бырайыакка киллэриллибитэ.
Саха сирин баһылыга Айсен Николаев «Экстра Синема» бырайыагы киинэ көрдөрүүтүн эйгэтигэр Россия технологическай суверенитетыгар барытыгар улахан суолталаах хардыынан ааттаабыта.
This post was published on 19.03.2026 10:03 10:03