Ааспыт нэдиэлэҕэ Дьокуускайга анал биригээдэлэр 55 көрүүтэ-истиитэ суох ыты туттулар. Барыта алта биригээдэ үлэлиир. Бу туһунан сэтинньи 20 күнүгэр куорат уопсай мунньаҕар иһитиннэрдилэр. Билигин куораттааҕы көрүүтэ суох дьиэтээҕи кыыллар хорҕойор сирдэригэр 1351 бэйдиэ сылдьыбыт ыт тутуллан турар диэн бэлиэтииллэр.
Саха сиринээҕи ветеринария департаменын инспектордара тоҕус рейдэни ыыттылар уонна дьиэ кыылын иитиигэ үс быраабыланы кэһиини бэлиэтээтилэр, икки административнай боротокуол оҥоһулунна.
Сайсаар уокуругун управатын салайааччыта Владимир Слепцов сарсыарда холбоһуктаах рейдэлэри ыытарга этии киллэрдэ. Уокурук олохтоохторун туоһутунан, быһа холоон 06:00 дьиссипилиинэтэ суох хаһаайыттар ыттарын моойторуга, томторуга суох бэйдиэ ыытан кэбиһэллэр.
This post was published on 20.11.2023 14:05 14:05