16 От ыйа 16.07
  • 23°
  • $ 87,81
  • 95,78

Аартыкка «СССР» бөлөх норуоту түмэр бырааһынньыгы бэлэхтээтэ

16:15, 09 мая 2018
Текст:
Читайте нас на
Яндекс Новости
ЯДВ

Өймөкөөн улууһун Аартык бөһүөлэгэр Улуу Кыайыы бырааһынньыгын икки тыыл бэтэрээнэ көрсөр.

87 саастаах Абый улууһун олохтооҕо Николай Хабаров уонна Өймөкөөн улууһун Биэрэк Үрдүн нэһилиэгин олохтооҕо, 92 саастаах Петр Колодезников Аартык бөһүөлэгэр аһыллан үлэлиир Кырдьаҕастарын дьиэлэригэр кэлэн олохсуйбуттара төрдүс сыла.

Ыам ыйын 8 күнүгэр ытык кырдьаҕастар чуумпу олохторо үөрүүнэн туолла. Бу күн Аартык бөһүөлэгэр Улуу Кыайыы күнүнэн сибээстээн, Өймөкөөн улууһугар Москва куораттан ыалдьыттыы кэлбит “СССР”  байыаннай-патриотическай  ырыа бөлөҕө кэлэн кэнсиэрдээтэ.

Биллэн турар, ытык кырдьаҕастар бырааһынньык дьоруойдарынан буоллулар. Кэнсиэр саҕаланыытыгар Аартык бөһүөлэгин баһылыга Сергей Литвинов уонна «Хаҥалас» көмүс хостуур хампаанньа үлэһиттэрин кытта бэтэрээннэри арыаллаан киллэрбиттэрин, олохтоохтор ытыс доҕуһуолунан айхаллаан көрүстүлэр. Ырыаһыттар кинилэргэ «Бэтэрээннэр» ырыаны бэлэхтээтилэр.

“СССР” бөлөх Афганистан сэриитин бэтэрээннэрин Арассыыйатааҕы сойуустарын байыаннай-патриотическай бөлөҕө Өймөкөөн көмүсчүттэрин өйөбүлүнэн улуус киинигэр уонна нэһилиэктэригэр сылдьан, Улуу Кыайыыга анаммыт кэнсиэртэри бэлэхтиир соруктаах. Айар кэлэктиип Чечня, Абхазия, Хотугу Осетия “итии точкаларыгар” сылдьан Ийэ дойдуга бэриниииллэх буолуу, патриотизмҥа сыһыаннаах ырыаларынан сэрииһиттэр санааларын, сүргэлэрин көтөҕөрө. “СССР” бөлөх солиһа, Кыһыл сулус икки уордьан кавалера Александр Жадан 1989 сыллаахха Афганистан кыраныыссатын бүтэһигинэн туораабыт дьонтон биирдэстэрэ.

Биһиги этиэхтэн кэрэ Өймөкөөн адаар таас хайалардаах кэрэ айылҕатын уонна улуус киинин Уус Ньара бөһүөлэгин туһунан түөрт ырыаны айдыбыт. Былырыын биһиэхэ олохтоохтор хомус бэлэхтээбиттэрэ. Онно оонньуурга үөрэнэн, кэлиҥҥи ырыаларбытыгар хомус доҕуһуолун киллэрэр буоллубут, — диэн бэлиэтээтэ ансаамбыл солиһа Александр Жадан.

Аартыктар киин сиртэн хаһан кэлэн кэнсиэртээбиттэрин умнубут буолан, «СССР» бөлөх кэнсиэригэр кыралыын-улаханныын бары кэриэтэ кэлэн, олус интэриэһиргээн көрдүлэр.

Афганистан сэриитин бэтэрээннэрэ Өймөкөөҥҥө үһүс сырыылара буолан, бу үтүөкэннээх дойдуну — Тымныы полюһун Өймөкөөнү ис сүрэхтэриттэн сөбүлээбиттэрин биллэрдилэр.

«СССР» патриотическай ырыа бөлөҕүн улуустааҕы муниципалитет баһылыгын бастакы солбуйааччы Игорь Водовозов  уонна «Хаҥалас» көмүс хостуур хампаанньа кылаабынай инженерэ Пюрвя Кармадаев арыаллаан илдьэ сырыттылар.

Ыалдьыттар Аартыктааҕы орто оскуола үөрэнээччилэрин Улуу Кыайыы күнүнэн эҕэрдэлээтилэр. Аччыгый кэмпилиэктээх оскуола 25 эрэ оҕолоох. Манна 11-с кылааска биир эрэ оҕо үөрэнэр. Уоннааҕы кылаастар иккилии-үстүү оҕолоохтор. Оҕолор күндү ыалдьыттарыттан бэлэх тутан, истиҥник махтаннылар.

Ол кэнниттэн оройуон уонна көмүс хостуур тэрилтэ салайааччылара  17 оҕолоох оҕо саадын кырачааннарыгар сырыттылар.

Быйыл 4 оҕо оскуола боруогун атыллыаҕа. Кырачааннар эмиэ минньигэс бэлэҕи тутан, үөрэн харахтара үөрүү кыымынан чаҕылыҥнаата.

Ытык кырдьаҕастарга эмиэ бэлэх тигистэ. Ол курдук, Кырдьаҕастар дьиэлэригэр көмүсчүттэр телевизор бэлэхтээтилэр.

Кэнсиэр кэнниттэн дьон өргө диэри тарҕаспакка, «СССР» патриотическай ырыа ансаамбылын кытта сирэй көрсөн кэпсэттилэр, хаартыскаҕа түстүлэр. Аартык бөһүөлэгин олохтоохторо, Педа дьиэ кэргэн кэнсиэр туһунан санааларын бу курдук үллэһиннилэр:

Биһиги сэбиэскэй кэмтэн ыла ыраахтан кэлбит артыыстар кэнсиэртэрин көрө иликпит. Бөлөх төрөөбүт дойдуга таптал, сэрии уонна кыайыы курдук патриотическай ырыалары таһынан, биһиги Өймөкөөммүт туһунан бэрт истиҥ ырыалары бэлэхтээн олус үөртүлэр. Улуу Кыайыы бырааһынньыгар бэйэлэрин ырыаларынан сүргэбитин көтөҕөн  бардылар.

«ССCР» бөлөх сарсын эрдэ алта чааска туран, Томтор нэһилиэгэр айанныаҕа. Онно тыа сирин олохтоохторугар Улуу Кыайыы кэнсиэрин бэлэхтиэҕэ.

Елена ПОТОЦКАЯ, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА