Дьокуускайга Дмитрий Коркин аатынан турнирга Азербайджан сүүмэрдэммит хамаандатын биир саамай кэскиллээх бөҕөһө Джабраил Гаджиев кэлиэҕэ. Бу туһунан өрөспүүбүлүкэтээҕи сүүмэрдэммит хамаандалар спортивнай бэлэмнэниилэрин киинигэр иһитиннэрдилэр, диэн ЯСИА суруйда.
Кини аан дойду уонна Европа күрэхтэһиилэригэр араас саастаахтарга кыайа-хото сылдьан, маастарыстыбатын көрдөрөр. Оттон быйыл Хорватияҕа ыытыллыбыт аан дойду чемпионатын топ-5 (79 кг) киирдэ.
Дьокуускайга кини бастакытын тустар буолбатах. Көҥүл тустууну таптааччылар кинини 2021 сыллаахха Роман Дмитриев аатынан норуоттар икки ардыларынааҕы турнирга кыттыбытын өйдүүллэр. Оччолорго Азербайджан хамаандатын бэрэстэбиитэлэ 70 кг диэри кыһыл көмүһү ылбыта.
Кинини кытта Азербайджан сүүмэрдэммит хамаандатын састаабыгар Рашид Бабазаде кэлиэҕэ. Кини 23 саастарыгар диэри спортсменнарга (2023 с.) 65 киилэҕэ диэри ыйааһыҥҥа Европа күрэхтэһиитин үрүҥ көмүс мэтээлин хаһаайына буолар.
Санатан эттэххэ, Дмитрий Коркин аатынан норуоттар икки ардыларынааҕы күрэхтэһии Дьокуускайга «Триумф» спорткомплекска сэтинньи 15-16 күннэригэр буолуоҕа. Саха сирин сүүмэрдэммит хамаандатын састаабыгар хамаанда бары лидердэрэ киирсиэхтэрэ.
