Нерюнгри куоракка ыытыллыбыт мас-рестлиҥҥэ Россия чемпионатын түмүгүнэн улахан норуоттар икки ардыларынааҕы күрэхтэһиилэргэ кыттарга дойду сүүмэрдэммит хамаандатын састааба быһаарылынна. Сүрүн стартарга ким барыай, ЯСИА-ҕа РФ хамаандатын кылаабынай тренерэ Николай Константинов кэпсээтэ.
«Нерюнгрига күрэхтэһии ситиһиилээхтик түмүктэннэ. Сүүмэрдэммит хамаандаҕа билиҥҥитэ күүстээх спортсменнар киирбиттэрин этиэххэ наада. Кыайыылаахтар сэтинньи 26-30 күннэригэр Татарстаҥҥа буолар мас-рестлинг аан дойду чөмпүйэнээтигэр кыттар быраабы ыллылар. Онуоха сүүмэрдэммит хамаанда чилиэннэригэр бэлэмнэниини ааһыы булгуччулаах буоларын бэлиэтиэм этэ. Бэлэмнэнии ыам ыйын 12-26 күннэригэр Сочига былааннаналлар», — диэн ЯСИА-ҕа Николай Константинов кэпсээтэ.
Саха спортсменнарын туһунан этэр буоллахха, аан дойду чемпионатыгар Артур Жирков (60 кг), Ариан Григорьев (65 кг), Айсиэн Мигалкин (70 кг), Константин Жирков (75 кг), Василий Захаров (80 кг), Семен Борисов (90 кг), Семен Степанов (105 кг), Ирина Севрюк (65 кг), Саина Седалищева (75 кг) уонна Валерия Никифорова (85+ кг) барар бырааптаннылар. Атын регионнартан хамаанда лидердэринэн Иван Галкин (125 кг), Виктор Колибабчук (125+ кг), Лейла Шагисултанова (55 кг), Ольга Сукач (85 кг) буолуохтара.
«Россия сүүмэрдэммит хамаандатын иккис нүөмэрдэрэ Кыргыстааҥҥа көс дьон аан дойдутааҕы оонньууларыгар барыахтара. Бу аан дойду үрдүнэн элбэх спорду таптааччылар болҕомтолорун тардар престижнэй норуоттар икки ардыларынааҕы күрэхтэһиилэрэ буолар. Онно эмиэ бастакы нүөмэрдэри туруорар санаалаах этибит да, иккис састаапка эмиэ бастыҥнар бааллар. Ону таһынан Нерюнгрига боруонса призердар икки ардыларыгар бырахсан хапсыһыылары ыыттыбыт. Кинилэр солбуйар хамаанда саппааһыгар киириэхтэрэ», — диэн кылаабынай тренер бэлиэтээтэ.
Көс дьон аан дойдутааҕы оонньуулара атырдьах ыйын 31 күнүттэн балаҕан ыйын 6 күнүгэр диэри Бишкеккэ буолуохтара. Мас-рестлиҥҥэ барыта алта ыйааһыҥҥа мэтээллэр оонньонуохтара. Барылаан быһаарыынан, онно саха спортсменнара Василий Чемпин (70 кг), Егор Атласов (90 кг), Денис Федоров (125+ кг), Наталья Черноградская (55 кг) уонна Вера Чичигинарова (85+ кг) барыахтара. Россия сүүмэрдэммит хамаандатыгар Башкортостантан сылдьар спортсмен Азалина Хабирова (75 кг) эмиэ киирдэ.
