Муус устар 22 күнүгэр Хаҥалас улууһугар, Өктөм сэлиэнньэтин олохтооҕо Владислав Ксенофонтов бырайыагынан, «Аҕа уолунаан» күрэхтэһии, дьиэ кэргэн көҕүлээһининэн, ыытылынна.
Күрэхтэһии быйыл уопсайа бэһис төгүлүн тэрилиннэ. Бастаан икки сыл нэһилиэккэ ыытыллыбыта, онтон үһүс сылыттан, сэҥээриини ылан, кэҥээн, улуус таһымыгар ыытыллар буолла.
Аҕалар уолаттарынаан, сырыы аайы, үгэс быһыытынан, олус көхтөөхтөрүн көрдөрөллөр. Быйыл алта хамаанда кытынна. Бары даҕаны, араас таһымнаах күрэхтэһиилэргэ кыттыбыт, уопуттаах дьон буоллулар.
«Дьиэ кэргэн дьолун кистэлэҥэ» (дьиэ кэргэни билиһиннэрии), «Сыал ытыыта», «Уот оттон, биэдэрэҕэ чэй өрүү», «Буурунан мууһу тэһии», «Балыктааһын» — бу маннык, биэс түһүмэхтээх тыҥааһыннаах киирсии түмүгүнэн, «Аҕа уолунаан-2018» күрэхтэһии кыайыылаахтарынан Федор уонна Володя Тимофеевтар таҕыстылар. Бастаабыт хамаандаҕа Владислав Ксенофонтов бэйэтэ оҥорбут тупсаҕай дьыбаана үөрүүлээх быһыыга-майгыга туттарылынна.
Манна даҕатан эттэххэ, Владислав Ксенофонтов сыл аайы кулуһуҥҥа миин, чэй өрөн, күрэхтэһии кыттааччыларын тото-хана аһатар үтүө үгэһинэн, дьон истиҥ махталын ылыан ылар.
«Аҕа уолунаан» күрэхтэһиигэ иккис миэстэни Степан уонна Гоша Давыдовтар, үһүс миэстэни Николай уонна Айтал Баишевтар ыллылар.
Кыттааччылары кими да матарбатылар — бары түһүмэхтэргэ тус туһунан миэстэлэр анананнар, мэтээллэр, өйдөбүнньүк бэлэхтэр уонна Махтал суруктар туттарылыннылар.
Бу тэрээһиҥҥэ өрөспүүбүлүкэтээҕи «Эйгэ» уопсастыбаннай тэрилтэ чилиэннэрэ үһүс сылын кытыннылар, күрэхтэһээччилэргэ ырыаларын-тойуктарын бэлэхтээтилэр.
Өктөм, Тиит Арыы, Нөмүгү нэһилиэктэриттэн, Хаҥалас, Усуйаана, Ленскэй, Ньурба, Дьааҥы, Уус — Майа курдук араас улуустартан тиийэ уонна Дьокуускай куораттан түмсэн, интэриэһинэй күрэхтэһиини көрөн, дьон үөрэн, чэбдик салгыҥҥа дуоһуйа сынньанан тарҕаста.
Бу — уол оҕону иитиигэ, сиргэ-дойдуга, бултка сылдьарыгар үөрэтиигэ-такайыыга биир саамай сөптөөх бырайыак.
Татьяна МАРКОВА, «Саха сирэ» хаһыат, edersaas.ru
