Таатта оройуонугар икки күн устата ыытыллыбыт «Аҕа күрэҕэ» диэн аҕалар уонна уолаттар XXVI өрөспүүбүлүкэтээҕи күрэхтэһиилэрин түмүктэрин таһаардылар. Күрэхтэһии кыайыылаахтарынан Амма улууһуттан төрүттээх аҕа Николай Алексеев уола Айсенныын буоллулар. Кыттааччылар кэккэ тургутуулары аастылар, ол иһигэр булт биатлонун, бэрэбинэни суорааһыны, ойбону алларыыны, кулуһун оттуутун, бэрэбинэни эрбээһини, маһы бэлэмнээһини уонна остуолбаҕа тахсыыны.
Иккис миэстэни Мэҥэ Хаҥалас улууһуттан Максим уонна Андрей Пивоваровтар ыллылар. Үһүс Чурапчы улууһуттан Саян уонна Сергей Крыловтар буоллулар.
Саха сирин баһылыга Айсен Николаев МАХ-ханаалыгар кыайыылаахтары, призердары эҕэрдэлээтэ, ону тэҥэ норуот үгэһин тутуһан, сайыннаран кыттааччыларга, тэрийээччилэргэ махтанна.
«Күрэхтэһии кыайыылаахтарын, призердарын эҕэрдэлиибин. “Аҕа күрэҕэ» диэн ыал күүһэ, аҕатыгар ытыктабыла, көлүөнэлэр ситимнэрэ уонна төрөөбүт сиргэ таптал ордук чаҕылхайдык көстөр тыыннаах үгэс. Бары хамаандаларга элбэх оҕолоох ыаллар кытталлара олус улахан суолталаах. Чуолаан маннык ыалларга аҕа холобура, үлэтэ-хамнаһа, тулуурдаах буолуута уонна эппиэтинэһэ уолаттарыгар олох дьиҥнээх оскуолата буолар. Күрэхтэһиигэ кыттыбыт ыалларга, тэрийээччилэргэ, судьуйаларга уонна Таатта улууһун олохтоохторугар бу дьоһун үгэһи тутуһан, сайыннара турарын иһин махтанабын. Маннык тэрээһиннэр Саха сиригэр дьиэ кэргэн сыаннастара бөҕө буолалларын, ол аата өрөспүүбүлүкэ бэйэтэ эмиэ бөҕө буоларын өссө төгүл көрдөрөллөр. Аны эһиил күрэхтэһиини Амма улууһа — быйылгы муҥутуур чемпионнар төрөөбүт дойдулара ылыаҕа. «Аҕа күрэҕэ» салгыы да ыаллары түмэн, көлүөнэлэр ситимнэрин бөҕөргөтөн, өрөспүүбүлүкэбит бастыҥ үгэстэрин тутуһуо диэн эрэнэбин», – диэн Ил Дархан суруйда.
Быйыл бастыҥнар ааттарын ылар иһин Саха сирин 11 оройуонуттан 13 хамаанда кииристэ. Тэрийээччилэр бэлиэтииллэринэн, күрэхтэһии аҕа уопсастыбаҕа статуһун, оруолун үрдэтиигэ, чөл олоҕу пропагандалааһыҥҥа, ону тэҥэ дьиэ кэргэн, национальнай уонна спортивнай үгэстэри харыстааһыҥҥа туһуланар.
Туспа дьиссипилиинэҕэ — тоҥуу хаарынан сүүрүүгэ – Мэҥэ Хаҥалас улууһуттан Андрей Пивоваров кыайыыны ситистэ. Киниэхэ Таатта улууһун баһылыга Айаал Бурцев олохтообут 50 тыһыынча солкуобай анал бирииһин туттардылар.
Санатан эттэххэ, 2024 Сыллаахха Саха сирин баһылыга Айсен Николаев өрөспүүбүлүкэ алта элбэх оҕолоох аҕатыгар сыл аайы «Ытык аҕа» («Бочуоттаах аҕа») бэлиэни туттарыы туһунан ыйаахха илии баттаабыта. Көҕүлээһин чэрчитинэн оҕону иитиигэ ураты өҥөлөрүн иһин 100 тыһыынча солкуобай кээмэйдээх биир кэмнээх харчынан наҕараадалааһын көрүллэр. Наҕараадалааһын сылга иккитэ ыытыллар — Саха сиригэр аҕа күнүгэр уонна Бүтүн Арассыыйатааҕы аҕа күнүгэр.
This post was published on 23.03.2026 11:03 11:03