Анал байыаннай дьайыы бэтэрээнэ, Аҕа дойду көмүскээччилэрин Кубогын бүтүн Россиятааҕы финалын призера, Саха сириттэн сылдьар Алексей Антипин СВО бэтэрээннэрин ортолоругар Аҕа дойду көмүскээччилэрин Кубогын Уһук Илиҥҥитээҕи түһүмэҕэр эмиэ кыайыы иһин киирсиэҕэ, диэн НВК Саха сайт суруйар.
«Быйыл үс көрүҥҥэ кыттыыны ылыам: олорон эрэн оонньуур волейболга, пауэрлифтиҥҥа уонна оҕунан ытыыга. Спорт көмөтүнэн мин этим-хааным туругун чөлүгэр түһэрдим, бэйэбэр эрэли ыллым. Биһиги хас күн аайы эрчиллэбит уонна бу күрэхтэһиилэргэ Саха сирин чиэһин көмүскүүргэ тугу барытын оҥоруохпут», — диэн Алексей Антипин үллэһиннэ.
СВО бэтэрээнэ артиллерийскай биригээдэ пушечнай самоходно-артиллерийскай дивизионун старшай наводчигынан сулууспалаабыта. Биир киирсиитин кэмигэр кини самоходнай тэрилэ алдьаммыта, экипааһа ыарахан эчэйиини ылбыта. Онон эдэр буойун олоҕун саҥа кэрдииһэ саҕаламмыта — уһун кэмнээх эмтэнии уонна реабилитация.
Бу уустук суолга кинини чугас дьоно — аҕата уонна бииргэ төрөөбүттэрэ, оттон 2023 сылтан — «Аҕа дойдуга көмүскээччилэр» пуонда салаата өйөөбүттэрэ.
Пуонда салаатын көмөтүнэн Алексей үрдүк технологиялаах протезтары ылла, олорор дьиэтин киниэхэ сөптөөх гына оҥоһуллубута, ону таһынан кини «С кибатлетикой строим будущее» диэн комплекснай реабилитация бырагырааматын кыттааччыта буолбута.
2024 сыл сааһыгар Алексей Антипин оҕунан ытыынан дьарыктанан барбыта, оттон Саха сиригэр СВО кыттааччыларыгар аналлаах I Регионнааҕы комплекснай физкультурнай тэрээһиҥҥэ «Аҕа дойду көмүскээччилэрин Кубогар» армрестлиҥҥэ эмиэ күүһүн холонон көрбүтэ. Бастакы кыттыыта ситиһиилээх буолбута: Алексей оҕунан ытыыга эрэ буолбакка, армрестлиҥҥэ эмиэ кыайбыта.
Бу кэмтэн ыла кини көхтөөх спортивнай олоҕо саҕаламмыта. Бүгүҥҥү күҥҥэ Алексей — өрөспүүбүлүкэтээҕи күрэхтэһиилэр элбэх төгүллээх кыайыылааҕа уонна призөра, Уһук Илиҥҥи федеральнай уокуруктааҕы «Аҕа дойдуга көмүскээччилэр Кубоктарын» үрүҥ көмүс призера уонна бүтүн Россиятааҕы финалга боруонса призера.
Чөмпүйүөннэр баалларыгар Россия Дьоруойа Игорь Юргин Алексей Антипиҥҥэ СӨ Физическэй култуураҕа уонна спорка министиэристибэтин «Анал байыаннай дьайыы бэтэрээннэрин ортолоругар спорт сайдыытыгар кылаатын иһин» анал наҕараадатын туттарда.
Бүгүҥҥү күҥҥэ бэтэрээн от ыйын 10-14 күннэригэр Соҕуруу Сахалинскайга ыытыллыахтаах анал байыаннай дьайыы бэтэрээннэрин ортолоругар «Аҕа дойду көмүскээччилэрин Кубогын» Уһук Илиҥҥитээҕи түһүмэҕэр мэтээллэр иһин эмиэ киирсэргэ бэлэм.
Источник НВК Саха
This post was published on 07.07.2025 17:12 17:12