Хатаска «Агрогородок» биир киин уулуссатыгар тобоҕу, быраҕыллыбыты, туһаныллыбыты мунньар анал контейнердар турар сирдэрэ тупсарыллан оҥоһулуннулар. Бу үлэ олохтоох эр дьон күүстэринэн буолбута кэрэхсэбиллээх.
Бу саас ырааһырдыныы ыйыгар маҥнайгы Баҕарах түөлбэ субуотунньугар салайааччы Попов Н.С. олус үчүгэй ыччат дьонноох эбиппит диэн турардаах. Бөх-сах, тобох-ибэх мунньуллар «санитарнай точка» диэн ааттанар анал тутуулары сөргүтэн, саҥалыыттан оҥоруон баҕалаах эдэркээн киһи туһунан кини эппитэ.
Тимур Ташпулатов элбэх оҕолоох дьиэ кэргэҥҥэ иитиллибитэ, Хатас оскуолатын бүтэрбитэ. Ийэлэрэ өр сылларга полицияҕа оҕо аймах бэрээдэги кэһиитин утары үлэлээбит буолан, дьиэтигэр дэҥҥэ көстөрө. Онон Тимур кыра эрдэҕиттэн бэйэтин эрэ туһугар буолбакка бырааттарын, балтын туһугар эппиэтинэскэ иитиллибитэ, быһаарса, оҥоро-тута, айар, дьайар аартыкка үктэммитэ. Мэлдьи сэргэх сэбэрэлээх, чэбэр ыраас көстүүлээх буолара. Үөрэҕи бүтэрэн, үлэ-хамнас булунан Хатаһыгар төннөн кэлбитэ. Киэҥ-куоҥ эйгэҕэ сылдьыбыта, араас улахан куораттары кэрийэн ыраастык туттан олоруохха сөбүн илэ хараҕынан көрөн истэн кэлбитэ. Бу туһугар күндүтүк саныыр Хатаһыгар үлэтиттэн чорботунан мунньуммут үбүн уопсай хааһынаҕа биэрэн туран, үтүө дьыаланы оҥордо!
Ол туһунан дьаһалта баһылыгын солбуйааччы Пинигин Василий Егорович маннык кэпсиир:
— Быйыл саас Тимур Ташпулатов бачча суумалаахпын, онно бөх тоҕор сирбитин холобурга сылдьар гына үчүгэй оҥоһуулаах оҥоруохпун баҕарабын диэн этиилээх кэлбитэ. Кини Хатас хамсаныыта түмсүүгэ эрэлэ улахан этэ. Толкуйдаан, сүбэлэһэн баран контейнардар турар сирдэрэ бетоннаммыт буолуон наада диэн түмүккэ кэлбиппит. Толкуй ырытыы кэмигэр эдэр уол бачыымын өйүүбүн уонна көмөлөһөбүн диэччи Александр Павлов баар буолбута. Дьэ ити курдук ааҕан-суоттаан матырыйаалы атыылаһыы, аҕалыы саҕаламмыта.
Василий Егорович бииргэ төрөөбүт убайынаан Денис Пинигинниин үтүө дьыаланан оҥорбуттара элбэх — турниктар, боруоталар уо.д.а. бу да сырыыга туора турбатылар. Салайааччы тус бэйэтин кырааннаах массыыната үгүс үтүө дьыала матырыйаалын босхо тиэйэн аҕалара сонун буолбатах.
Ити курдук тимир өттүн Пинигиннэр дьаһайбыт буоллахтарына, мас өттүн кинилэргэ эбии Алексей Осипов, Андрей Саввин тустаах үлэлэрин кэнниттэн түүннэри үлэлэһэн, кээмэйдээн, быһан-отон, аалан, ыраастаан биэрдилэр.
Күндү ааҕааччым дьэ дьиҥ чахчы ис сүрэхтэн тахсыбыт үтүө дьыаланы оҥорбут биир дойдулаахтаргынан киэн тутун, салгыы кэпсээ.
Контейнердары туруорууга Васильев Григорий салайааччылаах
Филиппов Владимир, Андреев Алексей, Семенов Петр, Николаев Дмитрий, Неустров Михаил үлэлэстилэр.
Агрогодокка, Баҕарахха баар бөх тоҕор «санитарнай точка» олохтоох дьон баҕа санаатынан, бэйэтин үбүгэр-харчытыгар оҥоһулунна.
Ааптар: Наталья Руфова, Хатас
