Саха сиригэр 2025 сыл от ыйыттан «Салгынынан туорааһын» пилотнай бырайыак олоххо киирэр. Беспилотниктар Дьокуускай уонна Аллараа Бэстээх икки ардыгар 12 км уһуннаах маршрутунан рейстэри толороллор, үчүгэй күн-дьыл турдаҕына, быһа холоон, 15 мүнүүтэ көтөллөр.
Инновация, цифровой сайдыы уонна инфокоммуникационнай технологиялар министиэристибэлэрин пресс-сулууспата иһитиннэрэринэн, бу кэмҥэ дроннарынан 288 көтүү оҥоһуллубут, 668,5 киилэ таһаҕас тиэйиллибит — ас-үөл, эмп-том, докумуон. Сорох күн 10-ҥа тиийэ рейс оҥоһуллар.
«Бырайыак дроннар туруктаах логистикаҕа уонна тыын суолталаах таһаҕаһы туһаныыны үрдэтиигэ көдьүүстэрин бигэргэттэ. Биһиги бу хайысханы салгыы сайыннарыахпыт», — диэн Саха сирин инновацияҕа, цифровой сайдыыга уонна инфокоммуникационнай технологияларга миниистир Петр Николаев бэлиэтээтэ.
Пилота суох көтөр тэрили туһаныы таһыы болдьоҕун 2-3 төгүл аччатар, кыра партиялары тиэйии ороскуотун кыччатар уонна экстремальнай килиимэт усулуобуйатыгар даҕаны аҕалыы туруктаах буолуутун хааччыйар кыахтааҕын эттэ. Пилотнай бырайыак регион билиҥҥи транспортнай ситимигэр дроннар кыахтарын көрдөрдө.
Бырайыак Ил Дархан Айсен Николаев сорудаҕынан «Якутия» технопарк Boon Market маркетплейсын кытта инновациялары сайыннарыы пуондатын өйөбүлүнэн олоххо киирбитэ. Технологическай партнер — «Лаборатория будущего» хампаанньа, «Муравей 24» таһаҕас дроннарын оҥорор. Дрон оператордара — П.И. Дудкин аатынан Дьокуускайдааҕы сибээс уонна информационнай технология колледжын устудьуоннара.
Санатар буоллахха, Саха сирэ нэһилиэнньэлээх пууннар икки ардыларыгар БПЛА-ны регулярнай рейстэрин тэрийбит бастакы регион буолар. Гражданскай пилота суох көтөр авиасистиэмэлэр технологияларын сайыннарыы үлэтэ Россия президенэ Владимир Путин көҕүлээбит «Беспилотные авиационные системы» национальнай бырайыак чэрчитинэн ыытыллар «Разработка, стандартизация и серийное производство беспилотных авиационных систем» федеральнай бырайыак чэрчитинэн үлэлиир.
