Таатта улууһун Уолба нэһилиэгэр олорор Михаил Боппосов эҥинэ бэйэлээх сонун санаа, идиэйэ мунньуллубут киһитэ диэтэххэ, омуннааһын суох.
Кини хас Саҥа дьыл бырааһынньыгын ахсын, балбааҕынан сыл бэлиэтин оҥорон дьону-сэргэни үөрдэр-көтүтэр үгэстэммитэ алта сыл буолла. Ол курдук, балбаахтан киһи эрэ көрөн манньыйар эбисийээнэлэрин, козаларын, сылгыларын, моҕойун, быйыл үс аҥар миэтэрэ үрдүктээх бөтүүгүн хаартыскалара сири сиксигинэн тилийэ көппүттэрэ. Маны таһынан, сааскы ылааҥы күнү уруйдаан, дьахтар бырааһынньыгынан, эмиэ ураты оҥоһугунан соһуччу бэлэх оҥорон өрөспүүбүлүкэ кэрэ аҥардарын барыларын манньытан турардаах.
Онтон бүгүн Михаил, аны, киһи эрэ көрөн сөҕөр, үөрэр саһаанын туруорбутун хаартыската ватсабынан тарҕанна. Биһиги Уолбаҕа эрийэн кэпсэттибит.
—Саһааным үрдүгэ 120 см., устата 12 миэтэрэ кэриҥэ. Үлэм быыһыгар туруорабын, онон бириэмэ син барар. Ити өссө ситэ илик. Эбии смайлик оҥоруохтаахпын, — диэн эттэ.
Биһиги Михаилга ситиһиилэри баҕарабыт. Кытаат, дьоҥҥун-сэргэҕин сонун санааларгынан, ураты оҥоһууларгынан бу курдук үөрдэ-көтүтэ сырыт.
This post was published on 25.04.2017 10:24 10:24