NEFU Fest норуотар икки ардыларынааҕы быыстапка-фестивалга аан дойду 33 дойдутуттан кытыннылар. Манна маастар-кылаастар, омук аһын, таҥаһын, үгэһин сүрэхтээһин буолла.
ХИФУ-гар аан дойду араас муннугуттан уопсайа 150 устудьуон үөрэнэр. NEFU International 2011 сылтан ыла үлэлиир.
Тэрийээччилэртэн биирдэстэрэ ХИФУ ФЭИ 5 кууруһун устудьуона Ирина Тимофеева этэринэн, тэрээһиҥҥэ Кытайтан, Соҕуруу Кореяттан, Кытайтан, Киргизияттан, АХШ-тан, Канадаттан, Австрияттан, Вьетнамтан, Индонезияттан, Малайзияттан, Афганистантан, Монголияттан, Таджикистантан, о.д.а дойдулартан кыттыбыттар.
NEFU кулууп урукку президенэ Джон Андерсон этэринэн, усутудьуоннар бэйэлэрин баҕаларынан фестивалга кытталлар. «Манна кыттарга ким да күһэйбэт. Тэрээһиҥҥэ сылы эргиччи бэлмнэннибит. Кулууп сүрүн сыала-соруга култууралар хардарыта дьайсыыларын олохтооһуҥҥа туһуланар. NEFU Fest – бэйэ култууратын, дойдутун билиһиннэриигэ кыаҕы үөскэтэр», — диир кини.
Швецияттан сылдьар 26 саастаах Мартина Нилсон ХИФУ-гар үһүс кууруска үөрэнэр. Быыстапкаҕа кини омугун төрүт аһын аҕалбыт. «Биһиги отонтон оҥоһуллубут джемнээх фрикадельканы уонна сыырдаах хортуоппуйу астаатыбыт. Ятцы (YATZY) скандинавия оонньуура уонна омукпут бэлиэтэ Даларнскай ат баар», — диир кини.
ХИФУ филолгическай факультетыгар үөрэнэр Япония студена Такуми Мизунумы омугун таҥаһын быыстапкаҕа сылдьыбыттар биһирээтилэр. «Мин Саха сирин олус сөбүлүүбүн. Ыраас салгынын, киэҥ нэлэмэн хонууларын туохтааҕар да ордоробун.
Бүгүҥҥү тэрээһиҥҥэ кэлбит дьон мин таҥаспын интэриэһиргээтилэр», — диир кини.
Австрияттан сылдьар 24 саастаах Ханна Файль СИА-ҕа араас тэрээһиннэргэ сөбүлээн кыттарын туһунан этэр. NEFU Fest анаан блины астаан аҕалбыт. «Манна кыһынын олус тымныы, ол эрээри дьоно-сэргэтэ олус эйэҕэстэр. Арассыыйаҕа элбэхтэ сылдьыбыппыт. Австрияҕа физкультураны үөрэтиэм. Ону таһынан нуучча туристарын кытта үлэлиир инструктордарга куурустары ыытыам», —диир Ханна.
Фестивалга NEFU саҥа президенин таллылар. Саҥа президенинэн Индонезияттан геологическай факультекка үөрэнэ сылдьар Пинг Канг Куделака буолла.
