17 От ыйа 17.07
  • 20°
  • $ 88,28
  • 96,26

Егор Борисов бырабыыталыстыба 2016 сыл бүтүөр диэри үлэтин сүрүн соруктарын быһаарда

15:20, 26 октября 2016
Текст:
Читайте нас на
Яндекс Новости
ЯДВ

Саха сирин парламенын пленарнай мунньаҕын кэнниттэн бырабыыталыстыба киэҥ ыҥырыылаах мунньаҕа буолла.


Мунньах үөрүүлээх түгэнинэн саҕаланна. Ол курдук, Егор Борисов бырабыыталыстыба бэрэссэдээтэлинэн үлэлээбит Галина Данчиковаҕа махтанна.

«Галина Иннокентьевна бюджеккэ, нолуокка Госдума тутаах кэмитиэтигэр киирдэ. Ону таһынан бюджеттар икки ардыларынааҕы сыһыан хос кэмитиэтигэр баар. Бииргэ үлэтин иһин махтанабын. Бу дуоһунаска кини эҥкилэ суох үлэлээн ааста», — диэтэ Ил Дархан.

Галина Данчикова бюджет сыһыаннаһыыларыгар үс өрүттээх хамыыһыйаҕа киирбитин эбэн этэр оруннаах. Манна РФ бырабыыталыстыбатын бэрэстэбиитэллэрэ, Федерация Сэбиэтин 40 чилиэнэ уонна Госдума 40 дьокутаата бааллар.

Ол кэнниттэн Егор Борисов бырабыыталыстыба саҥа анаммыт бэрэссэдээтэлигэр Евгений Чекиҥҥэ түөскэ анньыллар бэлиэни үөрүүлээх быһыыга-майгыга туттарда.

«Дьоҕус, орто бизнеһи кытыннаран туран инвестиционнай бэлиитикэни өрө таһаарыахтаахпыт, инновационнай салайыныыга көһүөхтээхпит. Евгений Алексеевич маныаха туспа көрүүлээх уонна быһаарсар торору кыахтаах», — диэтэ кини уонна Евгений Чекиҥҥэ туһаайан баар кыһалҕалары иҥэн-тоҥон билэргэ, былааннаахтык уонна бырабыыталыстыба чилиэннэрин кытта хардарыта дьайсыылаахтык үлэлииргэ ыҥырда.

Егор Борисов бырабыыталыстыба тутулун тупсарыыга, баһылык уонна бырабыыталыстыба дьаһалтатыгар уларыйыылар киириэхтэрин тустарынан өссө төгүл эттэ. Ону таһынан өрөспүүбүлүкэ судаарыстыбаннай сулууспалаахтарыгар баар быһыы-майгы, майгы-сигили, тутта-хапта сылдьыы кодексын тутуһарга уонна өрөспүүбүлүкэ дьонун олоҕун таһымын үрдэтиигэ үлэлииргэ ыҥырда.

Егор Борисов 2016 сыллааҕы бюджет дохуоттаах чааһа уонна нэһилиэнньэҕэ социальнай эбэһээтэлистибэлэр туолууларыгар инники үс сылга болдьохтоох бюджет бырайыагын үөскэтиигэ туһаайыллыбыт үлэни тиһэҕэр диэри тиэрдэргэ эттэ. Кыһалҕаҕа ыктарбыт тэрилтэлэри чөлүгэр түһэриигэ тохтоото. Сотору кэминэн өрөспүүбүлүкэ экономикатын салайыыга бырайыактыыр сыһыан киириэхтээҕин ыйда. Итиниэхэ бырабыыталыстыба чилиэнэрэ бары инновационнай менеджмент Үрдүкү оскуолатыгар үөрэниини ааһыахтаахтар.

2017 сыл тохсунньу 1 күнүттэн күүһүгэр киирэр уларыйыылар тустарынан нэһилиэнньэҕэ быһаарыы үлэтэ ыытыллыахтаах.

«Саамай сүрүнэ – өрөспүүбүлүкэ нэһилиэнньэтин буолаары турар уларыйыыларга бэлэмниэхтээхпит», —диир Егор Борисов.

Тупсарыы, киинэ сылларыгар анаммыт сыл тэрээһиннэрин үрдүк таһымнаахтык ыытарга уонна түмүгү таһаарарга сорудахтаата. Ону таһынан ыччат уонна экология сылларыгар анаммыт тэрээһиннэри бигэргэтэргэ эттэ. Ону таһынан Уһук Илиҥҥэ гектар сири босхо биэрэр сокуону боҕомто үөһүгэр тутарга эттэ.

«Сокуону күүһүгэр киллэри иккис түһүмэҕэ олоххо тилэри киириэхтээх. Саха сирин дьоно төһө кыалларынан сир-уот ылалларыгар усулуобуйата тэрийиҥ, ирдээҥ, тэрийиҥ!», — диэн Егор Борисов ыҥырда. Баайга-дуолга, сир сыһыаннаһыыларыгар министиэристибэ бу үлэҕэ бырабыыталыстыбаны эрэ буолбакка, муниципальнай былаас уорганын кыттыһыннарарыгар эттэ.

2016 сылга федеральнай киинтэн кэлэр үп-харчы кэмигэр туһаныллыахтааҕар тохтоото.

Следите за самым важным и интересным в Telegram-канале и WhatsApp-группе ЯСИА