25 От ыйа 25.07
  • 21°
  • $ 86,55
  • 94,38

Өймөкөөннөр тобуктарыгар диэри ууну кэһэ сылдьан оттууллар

15:17, 08 сентября 2016
Текст:
Читайте нас на
Яндекс Новости
ЯДВ

Өймөкөөҥҥө 94 га оттоммут сир, 145 тонна кэбиһиллибит от уонна тыа хаһаайыстыбатын хас да эбийиэгэ ууга былдьанна. Сири оҥоруу, мелиорация департаменын салайааччыта Александр Филатов быһыыны-майгыны миэстэтигэр тиийэн билистэ.


«Күн бүгүҥҥэ диэри 1250 га оттоммут сир ууга сытар. Бүгүҥҥү ааҕыынан улуус былаанын 61 бырыһыан толордо. Туран биэрбит күннэргэ былаан 70 бырыһыанын ситиһэр соруктаахтар», — диэн пресс-сулууспаҕа Александр Филатов этэр.

Дьон тобуктарыгар диэри ууну кэһэ сылдьан оттуурга күһэллэллэр. Охсуллубут отторун теннэргэ уурталаан үрдүк сирдэргэ таһааран куурдаллар. От куурбутун кэнниттэн кэбиһэллэр.

«Кэбиһиллибит от аллараа өттө биллэн турар, инчэҕэй. От ортотунан уонна үрдүнэн сүөһүнү, сылгыны аһатыахха сөп. Ол эрээри өймөкөөннөр балаһыанньаттан хайдах тахсары билэллэр, маннык усулуобуйаҕа үлэлиир уопуттаах дьон. Бэтэринээринэй сулууспа от хаачыстыбатын бэрэбиэркэлиэҕэ», — диир кини.

Сайын устудьуоннар этэрээттэрэ кэлэн окко көмөлөспүттэр. Улууска мобильнай 7 биригээдэ үлэлиир. Кинилэр 200 тоннаны оттуур былааннаахтар.

Бырабыыталыстыба дьаһалынан улуустар икки ардыларыгар оту тиэйиигэ үп-харчы көрүлүннэ. Хоту улуустарга оту тиэйиигэ уматык ороскуотун 75 бырыһыанын толуйуохтара. Онтон хаалбытын улуус уйунар.

«Хаһаайыстыбалар 430 тонна оту Таатта уонна Томпо улуустарыттан аҕалары былаанныыллар. Ону таһынан тыа хаһаайыстыбатын сүрүннүүр министиэристибэ комбикорму, зернофураһы тиэйии ороскуотун уйунуоҕа. Ону таһынан бу сотору 20 тонна тууһу тиэрдиэхтэрэ», — диир департамены салайааччы солбуйааччыта.

«Быйыл аһара күүстээх ардахтар түстүлэр. Маннык уулаах сиргэ оттуу үөрүйэхпит эрээри быйыл ураты ыарахан буолла. Тыа хаһаайыстыбатын министиэристибэтин сорудаҕынан сири оҥоруу үлэтин ыыппыппыт, ол көдьүүстээх көмө буолла. Бырабыыталыстыба, министиэристибэ көмө оҥороруттан биллэн турар, үөрүүбүт муҥура суох улахан», — диэн Өймөкөөн улууһун тыа хаһаайыстыбатын управлениетын салайааччыта Павел Сивцев этэр.

Следите за самым важным и интересным в Telegram-канале и WhatsApp-группе ЯСИА