Атырдьах ыйын 30 күнүгэр Майаҕа Комсомольскай болуоссакка олохтоохтор күһүнү көрсө биир саамай кэтэһэр бырааһынньыктара ‒ үгэскэ кубулуйбут «Быйаҥнаах тэлгэһэ» быыстапка-дьаарбаҥкалара тэрилиннэ.
Сайыҥҥылыы сылаас күн үүнэн болуоссакка көрөөччү, оҕо-аймах ахсаана хара баһаам буолла. Быйылгы тэрээһиҥҥэ тоҕус нэһилиэктэн 26 киһи кытынна. «Күһүҥҥү киһи күлбүтүнэн» диэн этиинэн салайтаран уйгу-быйаҥ өлгөм астаах остуоллары кыттааччылар төгүрүччү туран баһылаатылар. Таһаарыылаах атыы-тутуу тэрилиннэ, оҕуруот астарынан араас эриэккэс оҥоһуктар сэргээччилэрин буллулар, минньигэс ас сыта ыраахха диэри тарҕанна.
Оройуон сэбиэтин дьокутаата Зиновий Игнатьев бэрэссэдээтэллээх дьүүллүүр сүбэ кэрийэ сылдьан хас биирдии кыттааччы аһын-үөлүн эргим-ургум тутан көрдө. Эриэккэс бүлүүдэлэри: үрүмэлээх дьэдьэни, ынах тылынан желены, ымдааны астына-дуоһуйа амтаһыйдылар. Ону сэргэ баай Байанай бэлэхтэрэ ‒ көҕөн, чыркымай, сүүнэ улахан тыыкыбалар, кабачуоктар о.д.а. остуолу киэргэттилэр. Оттон кып-кыракый боруода сибиинньэ оҕолоро, кууруссалар, куруолуктар, коза, черепаха оҕо-аймаҕы ордук сэргэхситтилэр.
Быйылгы дьаарбаҥка биир ураты көстүүнэн рационализатордар бэйэлэрин мындыр оҥоһуктарын туруоруулара буолла. Дьүүллүүр сүбэ чилиэннэрэ сүбэлэһэн бараннар, эһиилгиттэн рационализатордар көрүү-быыстапкаларын эмиэ тэрийэргэ наадатын бэлиэтээтилэр.
«Быйаҥнаах тэлгэһэ‒2016» куонкурус «Айылҕа баайыттан авангард муода» диэн анал аат хаһаайкатынан Майаттан Ньургуйаана Михайлова уонна Нарыйа Барабанова, «Тэлгэһэ хаһаайката» ‒ Аллараа Бэстээхтэн Наталья Федорова, «Тэлгэһэҕэ үүнэр мастарга уонна үүнээйилэргэ бастыҥ» ‒ Майа олохтоохторо, Анна уонна Василий Романовтар, «Дьиэтээҕи сибэкки арааһыгар бастыҥ» ‒ Төҥүлүттэн Екатерина Михайлова, «Сир сиэдэрэй сибэккилэрэ» ааты Майаттан Прасковья Скрябина уонна «Сайыҥҥы биир күн кыһыны аһатар» диэн эт уонна үүт астартан бастыҥ быыстапка тэрийбит Майа олохтооҕо Анна Алексеева буоллулар.
Оттон тэрээһиннээхтик кыттыбыт нэһилиэктэргэ үһүс миэстэни хорообуттар, иккиһи Төҥүлү бөһүөлэгэ уонна бастакы миэстэни Майа түөлбэлэрин олохтоохторо ыллылар. Бары кыттааччыларга улуустааҕы ыччат уонна дьиэ кэргэн управлениета, «Майа сэлиэнньэтэ» МТ, Майатааҕы түөлбэлэр түмсүүлэрэ (сал.А.А.Филиппова) о.д.а. хаһаайыстыбаҕа наадалаах сыаналаах бириистэри туруордулар.
This post was published on 01.09.2016 10:13 10:13