2026 с. Өлүөнэ муостатын тутуутугар тоҕус саҥа тирэх тутуллуоҕа. Киин пилон коффердамын түһүүтэ саас муус ааспытын кэнниттэн былааннанар. Бу туһунан Саха сирин тырааныспарга уонна суол хаһаайыстыбатын миниистирэ Владимир Сивцев «Саха сирэ 24» телеханаалга «Актуальнай интервью» биэрии эфиригэр иһитиннэрдэ.
«Ааспыт сылга эбийиэккэ сүҥкэн үлэ ыытылынна. Бэлэмнэнии дьаһалларынан улахан комплекс үлэ толорулунна: технологическай былаһааккалар бэлэмнэммиттэрэ, бетон собуоттара туруоруллубуттара, буронабильнай сыбаайаларга армокаркастарын оҥоруу тэриллибитэ. Үлэ кыһыҥҥы кэми киллэрэн туран, сыл устата тохтоло суох ыытылынна», — диэн Владимир Сивцев иһитиннэрдэ.
Миниистир бүгүҥҥү күҥҥэ 100-тэн тахса сыбаайа, ол иһигэр хаҥас кытылга 70-чэ, уҥа кытылга 30-ча хаһыллан кутуллубутун бэлиэтээтэ. Барыта 920 буронабильнай сыбаайа тэриллэрэ уонна 26 тирэҕи тутуу көрүллүбүт. Ойоҕос пилон бастакы коффердама хомуллубут уонна киин пилон иккис коффердама улахан хомуллуута саҕаланна.
«Бу элемент конструкция акылаата буолар, кини ууга түһүүтэ кэлэр сыл сааһыгар муус ааспытын кэннэ былааннанар. Маннык технология Россияҕа аан бастаан туттуллар уонна чопчу чуолкайдаммыт, уустук инженернэй быһаарыылары эрэйэр», — диэн бэлиэтээтэ Владимир Сивцев.
Маны сэргэ Өлүөнэ муостатын бастакы тирэҕин бетоннааһын түмүктэннэ. Үлэ Өлүөнэ өрүс хаҥас кытылыгар оҥоһулунна, онно 4 №-дээх тирэх бетон конструкциялара барыта толору бэлэм.
Санаттахха, муоста тутуута сыл анараа өттүгэр саҕаламмыта. Бырайыак туһунан сигэнэн киирэн ааҕыҥ.
This post was published on 17.10.2025 15:43 15:43