2025 сыл бүтүөр диэри хаарбах дьиэттэн дьону көһөрүү бырагырааманан 60-тан тахса тыһ киһини көһөрөр былаан баар, ол эбэтэр 1,136 тыһ. кв. м саахалланар туруктаах иэнтэн босхолонуохтара. Ол туһунан дьиэ тутуутун дириекциятын генеральнай дириэктэрин э.т. Сергей Кылбанов социальнай ситимнэргэ эттэ, суруйар СИА.
«Саха сиригэр «Жилье и городская среда» национальнай бырайыагынан үтүмэн үгүс үлэ барар. 2025 сыл бүтүөр диэри аадырыстаах бырагырааманан 60 тыһ тахса киһини көһөрүөхтээхпит, ити 1,136 тыһ. кв. м саахалланар туруктаах иэни босхолооһун. Бу боппуруоһу быһаарыыга регион салалтата тутуу дирекциятын арыйда. Тэрилтэ бары муниципальнай оройуоттары кытта үлэлиир, хаарбах туруктаах дьиэлэринэн дьарыктанар. Дирекция өрөспүүбүлүкэҕэ бырагыраама үлэтин хааччыйар», — диэтэ Сергей Кылбанов.
Кини эппитинэн, билигин 478 тыһ. кв. м хаарбах туруктаах дьиэ иэнэ босхолонно, 27 тыһ киһи көһөрүлүннэ. Бырагырааманан 2019 сылтан саҕалаан, 180 элбэх кыбартыыралаах дьиэ тутулунна. Саҥа кыбартыыраларга 14 тыһ ыал көстө, ол иһигэр 3800 ыал харчынан компенсация ылла.
Сыл бүтүөр диэри 83 элбэх кыбартыыралаах дьиэ тутуллан бүтүөхтээх, онно 99,31 тыһ. кв. м иэннээх хаарбах туруктаах дьиэ көһөрүллэр. Саамай элбэх көһөрүү Таатта улууһугар – 11,7 тыһ. кв. м, Алдаҥҥа – 9,4 тыһ. кв. м уонна Ленскэйгэ – 8,2 тыһ. кв. м.
