Айсен Николаев Анал этиитигэр 2022 сылы Ийэ сылынан биллэрбитин Бэрдьигэстээх ийэлэрэ үөрэ, сэргии иһиттилэр. Саха АССР тэриллибитэ 100 сылыгар, 2022 с. төрөөбүт оҕоҕо 100 тыһ. солк. төлөнөрүн туһунан иһитиннэрдэ.
Бэрдьигэстээх нэһилиэгин дьахталларын Сэбиэтин бэрэссэдээтэлэ Мотрена Аргунова санаатын үллэһиннэ:
– 2022 с. ийэлэр, кыргыттар доруобуйаларыгар, дьарыктаах буолалларыгар анал бырагыраамалар үлэлиэхтэрэ диэбитин сэргээтим. Биһиги улууспутугар үлэтэ суох дьон ахсаана элбэҕэ бэлиэтэнэр. Үлэтэ суох ийэлэргэ нэһилиэнньэ дьарыктаах буолуу киинин нөҥүө араас көмөлөр, сүбэлэр баар буолуохтара диэн эрэнэбит. Ийэҕэ сыһыаннаах общественнай түмсүүлэр граннарын элбэтэргэ сорук туруорбута. Бу общественнай түмсүүлэргэ НКО быһыытынан регистрацияланан, граннарга көхтөөхтүк кытталларыгар кыаҕы биэрэр.
Саха АССР 100 сылын бэлиэтээн, 2022 с. оҕоломмут ийэлэргэ 100 тыь. солк. көрүллэрэ дьиэ кэргэҥҥэ көмөлөөх.
Биэстэн элбэх оҕолоох ыалы баай-дуол нолуогуттан босхолуурга этии киллэрдэ. Өрөспүүбүлүкэ сайдыытыгар, дьон-сэргэ олоҕо тупсарын туһугар элбэх соруктар ылыллан, үгүс үлэ ыытылларыттан үөрэбит.
Ааптар: Аэлита Андреева, Горнай улууһа
