23 От ыйа 23.07
  • 28°
  • $ 87,78
  • 95,76

«Бастыҥ спортсмен»: куоластааһыҥҥа Егор Пономарев кыайда

22:34, 25 апреля 2018
Текст:
Читайте нас на
Яндекс Новости
ЯДВ

Үгүс киһи өр күүппүт «Саха сирин киэн туттуута» бириэмийэ «Спортсмен» номинациятын финалистарын талыыга куоластааһын түмүктэннэ.

Кыайыылааҕы таларга 5999 куолас киирдэ. Онтон  2085 куолас — Егор Пономарев туһатыгар. Онон бу чааска Егор Пономарев Саха сирин бары муннуктарыттан эҕэрдэ тылын бастыҥын истэр.

Егор бэһис кылаастан көҥүл тустуунан дьарыктанар. Алтыс кылааска үөрэнэ сылдьан Таатта улууһугар ыытыллыбыт бастакы күрэхтэһиитигэр иккис миэстэни ылан турар. Ол кэмтэн ыла тустуунан дьаныардаахтык дьарыктанан,  2016 сыллаахха  61 кг ыйааһыҥҥа Арассыыйа чөмпүйүөнүнэн буолбута. «Бастыҥ спортсмен» номинацияҕа кыайыытын туһунан Егор Пономарев маннык санаалаах:

Миигин аймахтарым, доҕотторум, биир дойдулаахтарым улаханнык өйөөтүлэр. Күрэстэһэргэ үөрэхтээх буолан, бу кыайыыбар холкутук сыһыаннаһабын. Номинацияҕа кыайар иһин күөн көрсүбүт дьоммуттан Игнат Андросовы эрэ билэбин. Маннык бириэмийэни олохтуур наада. Ол курдук, куоластааһын кэмигэр үгүс киһи спорт араас көрүҥүн интэриэһиргээтэ.  

Дьэ, онон кыайыылаах финалистар куоластара маннык буолла:

  1.  Егор Пономарев — 2085 куолас, онтон 1385 — социальнай ситим 
  2. Руслан Пахомов — 1256 куолас, онтон 555 — социальнай ситим
  3. Сардана Осипова — 1130 куолас, онтон 549 — социальнай ситим
  4. Ирина Севрюк — 848 куолас, онтон 333 — социальнай ситим
  5. Игнат Андросов — 680 куолас, онтон 423 — социальнай ситим

Кыайыылаахтары барыларын эҕэдэлиибит! Аны аҕыйах хонугунан «Саха сирин киэн туттуута бириэмийэ «Норуот маастара» номинациятыгар куоластааһын саҕаланыаҕа. Онон тарбахтарыгар талааннаах дьоҥҥутун сыта-тура толкуйдаан, бу суолталаах куонкуруска кытыннарыҥ.

«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын үлэлиир үгэннэригэр сырыттахтарына этэн үөрдүү.

Бэлиэтээн эттэххэ, «Саха сирин киэн туттуута» бырайыак Саха сирин судаарыстыбаннаһын күнүгэр биллэриллибитэ. Ол курдук, алтынньыга ыытыллыбыт «Бастыҥ учуутал» номинацияҕа Чурапчы оскуолатын учуутала Владислав Кривошапкин, сэтинньигэ   — «Ыччат лиидэрэ» номинацияҕа ХИФУ профсойууһун кэмитиэтин салайааччыта  Артём Иванов кыайбыттара. Ахсынньыга «Быраас» номинацияҕа кыайыылааҕынан 2 №-дээх өрөспүүбүлүкэтээҕи балыыһа бырааһа Степан Тордуин«Култуура диэйэтэлэ» номинацияҕа Сунтаарга   үҥкүү бөлөҕүн салайар Августина Клакинова бэлиэтэммиттэрэ. «Бастыҥ урбаанньыт» номинацияҕа Руслан Федотов кыайыылааҕынан тахсыбыта. «Үлэ киһитэ» номинацияҕа Амматтан электромонтер Михаил Лазарев кыайбыта. Аны «Бастыҥ спортсмен» аакка Егор Пономарев тигистэ.

Бырайыак генеральнай партнера — саха иһитин-хомуоһун пропагандалыыр «Көмүлүөк» фирма.

Елена ПОТОЦКАЯ, «Саха сирэ» хаһыат, edersaas.ru

Хаартыска: СИА саайтыттан

Следите за самым важным и интересным в Telegram-канале и WhatsApp-группе ЯСИА