20 От ыйа 20.07
  • 17°
  • $ 88,02
  • 96,04

«Аҥардас аҕалар» уопсастыбаннай тэрилтэ субуотунньугунан сүрэхтэннэ

22:55, 13 мая 2018
Текст:
Читайте нас на
Яндекс Новости
ЯДВ

Өрөбүл күн киин куорат Сынньалаҥ уонна култуура пааркатыгар Үтүө дьулуур сылынан «Аҥардас аҕалар» уопсастыбаннай тэрилтэ чилиэннэрэ субуотунньук тэрийдилэр.


Уопсастыбаннай тэрилтэ былырыын тэриллэн баран, биир сыл иһигэр дьоһуннаах хамсааһыны оҥордо. Бу туһунан «Аҥардас аҕалар» уопсастыбаннай тэрилтэ салайааччыта Иннокентий Спиридонов  санаатын маннык үллэстэр:

— Урукку кэмнэргэ мин син биир судаарыстыба туох да көмөнү оҥорбот сүүрэн-көтөн да диэн саныырым. «ПОДРОСТОК» социальнай өйөбүлү оҥорор тэрилтэ  иһинэн сылдьар буолан, син тирэхтээх курдук сананар этибит. Аһынан-таҥаһынан өйөөн, улахан өйөбүлү оҥороллоро. Бу тэрилтэм миигин Аҕалар өрөспүүбүлүкэтээҕи  2-c сийиэстэригэр дэлэгээтинэн талбыта. Ол онно сылдьан, үгүс дьон санааларын истэн, билсэн, кэпсэтэн, уопсастыбаннай тэрилтэ тэрийэргэ санаммытым. Кэнники сылларга Ил Дархан уонна бырабыытылыстыба, министиэристибэлэр уонна  мэрия уопсастыбаннай хамсааһыннары улаханнык өйүүр буоллулар. Уопсастыбынньыктар да бэрт үгүс үлэни ыыталларын, онтулара түмүктээҕин көрө-истэ сылдьан, онтон да  кынаттаммытым диэххэ сөп. Сүрүн кыһалҕа — аҥардас аҕалар үгүстэрэ олорор дьиэлэрэ суох. Кыра хостору, дьиэлэри куортамнаһан олороллор. Ол иһин сир учаастагын ылан, дьиэ тутталларыгар, хаһаайыстыба тэринэллэригэр үлэлэһэ сылдьабыт.

Иннокентий Спиридонов быйылгы сыл саҥатыгар РФ Бэрэсидьиэнигэр Владимир Путиҥҥа: «Аҥардас аҕаларга өйөбүл оҥоһуллубат. Онон туох чэпчэтии баарын да билбэппит», — диэн суруйбутугар, бэрэсидьиэн аппараатыттан: «Бу маннык боппуруостары регионнар быһаараллар«, — диэн эппиэт кэлбит. Олохтоох биэдимэстибэлэр аҥардас аҕалары болҕомтоҕо ылан, дьэ хамсааһын тахсан эрэр эбит.

СӨ Ыччат уонна дьиэ кэргэн бэлиитикэтин миниистирин солбуйааччы Савва Михайлов биһигини кытта ыкса үлэлэһэр. Онон, түгэнинэн туһанан, Савва Анатольевичка махталбытын тиэрдиэхпит этэ. Кини мэрия исписэлиистэрин мунньан биһигини кытта «төгүрүк остуол» тэрийбитэ. Онно атах тэпсэн олорон, бэрт үгүс боппуруоһу ырыппыппыт, —— диэн кэпсиир Иннокентий Спиридонов.

Бу күннэргэ уопсастыбаннай тэрилтэ актыбыыстара миниистир Иван Луцканы кытта көрсүөхтээхтэр. Устааптарын, докумуоннарын оҥорон, НКО тэринэр былааннаахтар.

—  Билигин сүрүн сорукпут — улуустарга тахсан, аҥардас аҕалар уопсастыбаннай тэрилтэлэрин филиалларын арыйыы. Өрөспүүбүлүкэбитигэр  8 тыһ. тахса аҕа баар. Бу дьону барыларын түмэн, араас хайысхалаах үтүө дьыаланы ыыттахпытына, төһөлөөх хамсааһын тахсыаҕай?   Өрөспүүбүлүкэбитигэр Аҕа, Уол оҕо, Кыыс оҕо, Булчут курдук бэлиэ күннэри аҥардас көрүнэн-нарынан эрэ бэлиэтээбэккэ, улахан суолталаах үлэлэри тэрийиэххэ наада. Оччоҕо улахан хамсааһын тахсыа этэ, — диэн бэлиэтиир «Аҥардас аҕалар» уопсастыбаннай түмсүү салайааччыта Иннокентий Спиридонов.

Уопсастыбаннай тэрилтэ чилиэннэрэ: «Уол оҕо бу сиргэ кэлбит аналын —  мас олордон, дьиэ туттан, уол оҕо төрөтөн олоҕун олоруохтаах», — диэн өбүгэ саҕаттан кэлбит өйдөбүлгэ сирдэтэн, Сынньалаҥ пааркатын кытта кэпсэтэн, туспа сир анатан, мас олордон, «Аҕа скверин» оҥорору былаанныыллар.  Онтон аны учаастак ыллахтарына, бэйэ-бэйэлэригэр көмөлөсүһэн, дьиэ туттуохтара. Ол кэннэ, олохторун  салҕаан, дьоннорун ыал оҥортоон, сыыйа аҥардас аҕаны аҕыйатар үлэни ыытыахтара.

Пааркаҕа субуотунньук — аҥардас аҕалар бэйэ-бэйэлэрин кытта бастакы көрсүһүүлэрэ эбит. Батсаап-бөлөххө ыҥырсан кэлбиттэр.

Мантан инньэ паарка салалтатын кытта бииргэ үлэлээһин чэрчитинэн манна араас үлэни тэрийиэхтэрэ, үлэҕэ-хамнаска көмөлөһүөхтэрэ, онно паарка салалтата кинилэргэ илиитин  утары  уунан, оҕолору аттракционнарга босхо сырытыннарыаҕа, араас тэрээһиннэри тэрийиэҕэ.

Субуотунньукка аҕаларын кытта оҕолор эмиэ сырыттылар. Кырачаан алта уонна сэттэ саастаах Алисалаах Вика эһэлээх эбэлэрин кытта кэлбиттэр.

Аҕалара гидрометеоролог идэлээх буолан, бу күннэргэ Аммаҕа халаан кэмигэр үлэлии сылдьар эбит. Кыргыттар ийэлэрэ былырыын суол саахалыгар түбэһэн, суорума суолламмыт. Эдэркээн аҕа кырачааннарын туппутан соҕотоҕун хаалбыт. «Аҥардас аҕалар» батсаап-бөлөхтөрүттэн билэн, Необутовтар сиэннэрин кытта аҕаларын оннугар кэлбиттэр. Кырачааннар үлэһиттэрэ дьикти! Эбэлээх эһэлэрин кытта атах уопсан иһэллэр.

Субуотунньуктаан баран, оҕолор аҕаларын кытта буфекка киирэн итии киллэрдилэр. Остуол тула олорон, оҕолуун-аҕалыын бэйэлэрин билиһиннэрдилэр, инники былааннарын сүбэлэстилэр.

Онтон таһырдьа тахсан, уолаттар спортивнай тэриллэргэ дьарыктаннылар.

Ити курдук, ким эрэ илиитин уунан кэлэн көмөлөһөрүн кэтэспэккэ-манаспакка, аҥардас аҕалар түмсэн, баалларын биллэрэн, уопсастыбаннай тэрилтэлэрин субуотунньугунан сүрэхтээтилэр.

Мантан инньэ «Аҥардас аҕалар» уопсастыбаннай тэрилтэ үлэтэ-хамнаһа тэтимирэн барыаҕа. 

Елена ПОТОЦКАЯ, «Саха сирэ», edersaas.ru

Хаартыскаҕа ааптар түһэриитэ.

Следите за самым важным и интересным в Telegram-канале и WhatsApp-группе ЯСИА