2025 сылга биэнсийэни уонна социальнай хааччыйыыга, ону тэҥэ оҕолоох ыаллары, сорох категориялаах гражданнары, байыаннай сулууспалаахтары уонна кинилэр дьиэ кэргэттэрин чилиэннэрин, ол иһигэр АБДь кыттыылаахтарын социальнай өйөөһүн дьаһалларыгар ороскуот 166 миллиард солк.кэриҥэ буолла. Бу туһунан Российскай Федерация биэнсийэҕэ уонна социальнай страховкалааһын пуондатын Саха сиринээҕи салаатын управляющайа Марина Герман ааспыт сыллааҕы үлэтин түмүгүн туһунан дакылаатыгар Россия социальнай пуондатын Саха сиринээҕи салаатын өрөспүүбүлүкэтээҕи семинар-мунньаҕар иһитиннэрдэ.
Тэрээһин кулун тутар 24-26 күннэригэр ыытыллар. Семинар-мунньах Саха сирин оройуоннарыттан 35 клиент сулууспатын салайааччыларын, ону тэҥэ араас тэрилтэлэр уонна уопсастыбаннай тэрилтэлэр салайааччыларын түмтэ.
Өрөспүүбүлүкэ салалтатыттан тэрээһиҥҥэ СӨ бырабыыталыстыбатын бэрэссэдээтэлин солбуйааччы Георгий Степанов кыттыыны ылла. Вице-премьер РФ биэнсийэҕэ уонна социальнай страховкалааһын пуондатын СӨ салаатын кэлэктиибигэр дьон туһатыгар үлэлээбитин уонна дойду президенэ Владимир Путин биллэрбит судаарыстыба үрдүкү национальнай сыалын-соругун ситиһэрин иһин махтанна.
«Отчуоттуур сылга дьаһаллары сыыппараҕа көһөрүүгэ уонна гражданнары кытта бииргэ үлэлээһин проактивнай киэптэрин сайыннарыыга тутаах болҕомто уурулунна. Социальнай пуонда салаатынан өҥө улахан аҥара тэйиччиттэн бэрээдэгинэн бэриллэр, ол гражданнарга өҥөнү ылыы процеһын лаппа судургутутар. Оҕолоох ыаллары, анал байыаннай дьайыы кыттыылаахтарын уонна кинилэр дьиэ кэргэттэрин чилиэннэрин, аҕа көлүөнэ бэрэстэбиитэллэрин уонна инбэлииттээх гражданнары өйөөһүҥҥэ ураты болҕомто уурулунна», — диэтэ Арассыыйа Социальнай пуондатын Саха сиринээҕи салаатын управляющайа Марина Герман.
Ол курдук, 2025 сылтан АБДь демобилизацияламмыт кыттыылаахтара Россия Социальнай пуондатын 12 реабилитациялыыр кииннэригэр санаторнай-курортнай эмтэниини уонна медицинскэй реабилитацияны ааһыахтарын сөп. Саха сириттэн АБДь кыттыылаахтара АСП алта реабилитациялыыр кииннэригэр эмтэнэллэр: «Ключи» (Томскай), «Кристалл» (Анапа), «Омский» (Омскай), «Тараскуль» (Тюмень), «Туманный» (Хакасия), «Топаз» (Мыски).
Марина Герман 2025 сыл балаҕан ыйын 1 күнүттэн истэн үөрэнэр устудьуоннарга үрдэтиллибит кээмэйинэн оҕо төрүүрүгэр босуобуйа анаммытын – маннык төлөбүрү 135 устудьуон ийэ ылбытын бэлиэтээтэ.
Ону таһынан 2025 сылтан саҕалаан, ийэ (дьиэ кэргэн) хапытаалыгар сертификат хаһаайыттара 10 тыһыынча солкуобайга диэри үп тобоҕун биир кэмнээх төлөбүрүн ылыахтарын сөп.
РФ биэнсийэҕэ уонна социальнай страховкалааһын пуондатын Саха сиринээҕи отделениета страховкалаахтары кытта үлэтин салгыыр. 2025 сыл атырдьах ыйыгар страховкалаахтарга региональнай контакт-киин тэриллибитэ, сыл иһигэр 23 тыһыынча сайаапка киирбитэ. «Школа страхователя» бырайыак чэрчитинэн вебинардарга тэрилтэлэртэн 251 бэрэстэбиитэл кытынна.
2025 сыллаахха «Көхтөөх уһун үйэ» бырагыраама чэрчитинэн Уус Алдан, Мэҥэ Хаҥалас, Амма уонна Ленскэй улуустарга аҕа көлүөнэ алтыһар түөрт киин аһыллыбыта. Билигин Саха сиригэр 13 итинник киин үлэлиир. Кииннэргэ көмпүүтэр, цифровой уонна үп-харчы билиитигэр саҥа билиини, үөрүйэхтэри ылаллар.
