Мииринэй оройуонун Алмазнай бөһүөлэгин олохтооҕо 15 күн устата ойуурга муна сылдьыбытын буллулар. Кини биир күҥҥэ бултуу барбыт уонна мунан хаалбыт.
Эр киһи квадрацикылынан бултуу барбыт. Ойуурга бу тырааныспара алдьанан хаалбыт, онон дьиэтигэр диэри сатыы барарга санаммыт. Ол иһэн атын хайысханан баран иһэрин өйдөөбүт.
Атырдьах ыйын 30 күнүгэр кини муммутун туһунан иһитиннэрбит. Мииринэйдээҥи ЕДДС сулууспата көрдүүр үлэни саҕалыыр. Мобильнай телефон сигналынан кини ханна баарын барыллаан билбиттэр.
Балаҕан ыйын 5 күнүгэр Дьокуускай быыһааччылара көрдүүр үлэҕэ кыттыспыттар. Пилота суох аппараатынан тепловизор көмөтүнэн түүнүн көрдүүллэр эрээри булбаттар.
Бу кэмҥэ сүппүт, күүһэ-уоҕа эстибит, хам аччык киһи ботуруонунан уот саҕа сатаабыт.
Кини квадрациклын Алмазнай бөһүөлэгиттэн 38 км. тэйиччи сиргэ булбуттар. Көрдүүр үлэҕэ Ньурба филиалын быыһааччылара көмөҕө кэлбиттэр. Манна барыта 60-тан тахса киһи «Урааҥхай», «Трекол» вездеходтар, о.д.а. тиэхиньикэ туттуллубут.
Төһө да улахан үлэ ыытылыннар, муммут киһини балаҕан ыйын 11 күнүгэр биирдэ Аччыгый-Ботуобуйа өрүс таһыттан буллулар. Волонтердар кинини Светлай бөһүөлэгэр аҕалбыттар уонна балыыһаҕа тиэрдибиттэр.
This post was published on 12.09.2016 15:42 15:42