Аан дойду үрдүнэн коронавирус эпидемията туран, аймалҕаны таһааран эрэр. Оннооҕор ыраах сытар Саха сирин киин куоратыгар Дьокуускай куоракка кэлбитэ биллэн, харантыыҥҥа бардыбыт.


Дьокуускайдааҕы сэрии оҕолорун уопсастыбаннай түмсүүтүн бэрэссэдээтэлэ Зинаида Винокурова Аҕа дойду Улуу сэриитин кыттыылаахтарыгар, тыыл, үлэ бэтэрээннэригэр туһаайан этиитин http://www.sakhaparliament.ru сайта таһаарда.

Убаастабыллаах бэтэрээннэр!

Коронавирус туһунан «күөх экран» биэриилэриттэн, араадьыйа, хаһыат сонуннарыттан үчүгэйдик истэ-билэ, көрө олоробут.

СӨ Ил Дархана  Айсен Николаев кулун тутар 24 күнүнээҕи анал ыйааҕынан, кулун тутар 25 күнүттэн Дьокуускай куоракка уонна Жатайга 65-тэн аҕа саастаах дьон дьиэлэригэр олоруохтаахтарын туһунан эттэ.  

Убаастабыллаах биир саастыылаахтарым, Аҕа дойду Улуу сэриитин кыттыылаахтара, тыыл, үлэ бэтэрээннэрэ, ити сөптөөх этиини, дьаһалы ылыныаҕыҥ диэн  Дьокуускайдааҕы сэрии оҕолорун уопсастыбаннай түмсүүтүн аатыттан ыҥырабын!

Бэрт сотору ыам ыйын 9 күнүгэр Улуу Кыайыы үбүлүөйдээх 75 сылын бэлиэтиэхпит, онуоха диэри барыта этэҥҥэ буоларын туһугар биир санаанан салайтаран, хара дьайдаах эпидемияны утары охсуһуоҕуҥ. Туга-ханныга үчүгэйдик биллэ илигинэ, таһырдьа мээнэ тахсымыаҕыҥ, төһө кыалларынан, дьиэбитигэр бүгэн олоро сатыаҕыҥ!

Биир үөлээннээхтэрим, санааҕытын адьас түһэрбэккэ, аймаммакка буола сатыыргытыгар сүбэлиибин! Барыта этэҥҥэ буоларын туһунан эрэниэҕиҥ!

0
0

Хоруй суох