29 Кулун тутар 29.03
  • -14°
  • $ 92,26
  • 99,71

Жатайга баар эниэргийэни кэмчилиир дьиэ атыттарга холобур буоларын РФ былааһа билиннэ

14:36, 01 августа 2016
Читайте нас на
Яндекс Новости
ЯДВ

ДьКХ эйгэтин реформалааһыҥҥа көмөлөһөр фонда генеральнай дириэктэрэ Константин Цицин Жатай бөһүөлэгэр эниэргийэни кэмчилиир дьиэ олохтоохторугар «Дом образцового содержания» бэлиэни үөрүүлээх быһыыга-майгыга туттарда. Бу үрдүкү анал туругу олохтоохтор бэйэлэрин күүстэринэн ситистилэр: үп-харчы хомуйан дьиэлэрин өрөмүөннүүллэр, олбуордарын, подъезтарын тупсараллар.


«Эниэргийэни кэмчилиир технологиянан тутуллубут дьиэ бастыҥ, холобур буолара ураты улахан суолталаах», — диэн Константин Цицин эттэ уонна табаарыһыстыба салайааччытыгар Дмитрий Яныгиҥҥа биһирэбил бэлиэни туттарда.

Бөһүөлэк олохтоохторун кытта көрсүһүүгэ Саха сирин баһылыга Егор Борисов өрөспүүбүлүкэҕэ тутуу түргэн тэтимнээхтик барарын, ол иһигэр дьону эргэ дьиэлэртэн көһөрүү чэрчитинэн маннык тэрээһин элбээн иһэрин бэлиэтээтэ.

«Инники биэс сылга үс төгүл элбэх дьиэни тутар баҕалаахпыт. Үрдүк хаачыстыбалаах эрэ буолбакка, дьиэ ис хоһоонугар болҕомтобутун уурабыт. Биһиги нэһилиэнньэлээх пууннарга бэрээдэк баар буолуон баҕарабыт. Ону Жатай олохтоохторо дьэҥкэтик өйдүүллэр», — диэтэ Ил Дархан.

Табаарыһыстыба салайааччыта Дмитрий Яныгин дьиэ олохтоохторо бэйэлэрин үптэригэр-харчыларыгар өрөмүөн, ырааһырдыы, тупсарыы үлэтин ыыталларын ойуччу тутан эттэ.

Дьиэ квартиратын хаһаайыттара Ольга Соколова уонна Владислав Гладышев этэллэринэн, табаарыһыстыбаҕа техничкэлэр суохтар. Олохтоохтор бэйэлэрэ подъездтарын сууйаллар-сотоллор. Кэмчилээбит үптэригэр-харчыларыгар аҕыраада, шлагбаум уонна видео кэтээн көрүүнү туруорбуттар. Ону таһынан олохтоохтор субуотунньуктарга, бастыҥ тэлгэһэҕэ, подъездка анаммыт куонкурустарга, бырааһынньыктааҕы уонна спортивнай тэрээһиннэргэ куруук көхтөөхтүк кытталлар.

Жатайга баар эниэргийэни кэмчилиир дьиэ быраабылатынан, дьиэ резервэҕэ киин ититэр ситимнээх газовай хочуолунайдаах, газ уонна күнтэн эниэргийэни ылар коллектордар итии ууну хааччыйаллар. Итиини биэрэр оборудование автоматическай режиминэн үлэлиир, сөптөөх кыраадыһы тутан турар.

Үрдүк дуоһунастаах дьон Жатайга сылдьар кэмнэригэр эниэргийэни кэмчилиир технологиянан тутуллубут оҕо садыгар сырыттылар, ону таһынан уларытан оҥоһуллубут танкердары өрүскэ киллэрии үөрүүлээх тэрээһинигэр сырыттылар.

Следите за самым важным и интересным в Telegram-канале и WhatsApp-группе ЯСИА