Жатайдааҕы өрүс аалларын өрөмүөннүүр, тутар собуот тутуутун билистилэр

Жатайдааҕы өрүс аалларын өрөмүөннүүр, тутар собуот тутуутун СӨ тутууга уонна дьиэни-уоту кэтээhиҥҥэ судаарыстыбаннай Управление салайааччытын бастакы солбуйааччы Влад Пермяков билистэ.


Атырдьах ыйын 25 күнүгэр Влад Михайлович үрдүк технологиялаах тутуу бастакы түһүмэҕин хаамыытын, урукку кэһиилэри туораппыттарын көрдө.

Санатабыт, былырыын муус устар ыйыттан Жатай бөһүөлэгэр саҥа өрүс аалларын өрөмүөннүүр, тутар собуот тутуллар. Собуот үлэҕэ киирдэҕинэ, сылын аайы, уоҥҥа тиийэ уу аалын тутар кыахтаныа итиэннэ иккиттэн итэҕэһэ суох суудунаны көтүрэн, хос көдьүүскэ таһаарыа. Тутуу бастакы түһүмэҕэр федеральнай хааһынаттан 4,1 млрд үп көрүллүбүт. Эбийиэк эһиил сыл бүтүүтэ киирэрэ былааннанар.

Былааннаммыт бэрэбиэркэ түмүгүнэн Влад Пермяков сакаасчыты итиэннэ бырайыактыыр тэрилтэни кытары тэхиниичэскэй боппуруостары быһаарда, ирбэт тоҥ туругун кэтээн көрөллөрүн, кыраапыктан хаалыы баарын бэлиэтээтэ. Кини тутуу Ил Дархан хонтуруолугар сылдьарын, үлэ хаамыыта түргэтииригэр сүбэлээтэ.

This post was published on 26.08.2020 17:37 17:37