Үгүс педагог, нэһилиэнньэ эрэнэ кэтэһэр “Земскэй учуутал” федеральнай бырагыраама 2020-2022 сылларга үлэлиэҕэ. Маныаха ирдэбилэ барыта быһаарыллан турар. Билигин вакансия испииһэгэ чопчуланара эрэ хаалла.
СӨ Үөрэҕин уонна наукатын пресс-сулууспата иһитиннэрбитинэн, “Земскэй учуутал” бырагыраама вакансиятын испииһэгэ бу дьыл ахсынньы 25 күнүгэр диэри биллиэхтээх. Вакансияны аттарыыга нэһилиэнньэлээх пууннар демографическай балаһыанньалара итиэннэ социльнай-экэнэмиичэскэй кэскиллэрэ учуоттаныаҕа диэн ыйаллар. Дьон-сэргэ көһө турар, аҕыйыыр чинчилээх нэһилиэктэри саа тэбэр сиригэр чугаһаппатара чахчы. Аны эрдэ сэрэппиттэрин курдук, бырагыраамаҕа хапсааччылары анал хамыыһыйа көрүөҕэ. Ол эбэтэр, бырагыраамаҕа хапсан 2 мөлүйүөнү ылыахтарын баҕарар дьон, бэйэлэрин икки ардыларыгар куонкуруһу ааһаллар. Дьон, хамыыһыйаҕа кимнээх киириэхтэрэй диэн, сиэрдээх ыйытыыны биэрэр. Министиэристибэҕэ быһаарбыттарынан, манна уопсастыбаннай тэрилтэ, СӨ Үөрэҕин уонна наукатын министиэристибэтин бэрэстэбиитэллэрэ, куоластыыр бырааба суох эрэгийиэннээҕи оператор бэрэстэбиитэллэрэ киириэхтэрэ.
СӨ үөрэҕин уонна наукатын миниистирэ Владимир Егоров: “Идэлэригэр сөп түбэһэр квалификациялаах, сайабылыанньаларын биэрэллэригэр 55-гэр диэри саастаах орто анал эбэтэр үрдүк үөрэхтээх учууталлар хапсаллар. Учуутал биэс сыл устата тыа сирин оскуолатыгар баран үлэлииргэ бэлэм буолуохтаах. Бырагыраамаҕа барыллаан 50 квота көрүлүннэ”, — диэн этэр.
“Земскэй учуутал” бырагыраама бэрээдэгэ маннык:
— Тохсунньу 10 — муус устар 15 күннэригэр вакансия бигэргэтиллибит испииһэгинэн “учуутал” дуоһунаһыгар сайаапканы хомуйуу;
— Муус устар 16-30 күннэригэр – бырагыраамаҕа кыттыахтаах дьону куонкуруһунан сүүмэрдээһин;
— Ыам ыйын 1-15 күннэригэр – кыайыылаахтар испииһэктэрин бигэргэтии;
— Ыам ыйын 16 – бэс ыйын 15 күннэригэр – куонкурус кыайыылаахтара үлэлэрин миэстэтин баран билсиилэрэ (миэстэтигэр тиийэн);
— Бэс ыйын 5 – от ыйын 20 күннэригэр – үс өрүттээх үлэ дуогабарын түһэрсии;
— Балаҕан ыйын 1 – ахсынньы 1 күннэригэр – төлөбүрү толоруу уонна туттарыы.
“Саха сирэ” хаһыакка эрдэ суруллубутун курдук, ылбыт харчыларын учуутал бэйэтин баҕатынан туохха баҕарар туһаныан сөп, хайаан даҕаны дьиэ-уот ылыахтааххын диэн хааччахтаабаттар. Үчүгэйэ диэн, 2 мөлүйүөн сууматтан нолуок тутуллубат итиэннэ 55 сааһыгар диэри ханнык баҕарар учуутал кыттар бырааптаах. Ол эрээри, биэс сыл устата үлэлээбэккэ эрдэ барар түгэнигэр, учуутал ылбыт сууматын СӨ хааһынатыгар олоччу төнүннэриэхтээх.
