«Земскэй учуутал» бырагырааманан төлөбүр нолуоктан босхолонуута Россияҕа үөрэтии хаачыстыбата өссө тупсарыгар дьайыа диэн Госдума спикерэ Вячеслав Володин бу сокуон бырайыага ылылларыгар эттэ. Бу туһунан «Парламентская газета» хаһыат палата саайтыгар сигэнэн суруйда. 


Сэрэдэ күн Госдума нолуокка чэпчэтиилэри уонна төлөбүртэн көҕүрэтиилэргэ көннөрүүлэри эбии киллэрдэ. Володин Нолуок кодексыгар көннөрүүлэри киллэрии Президент Федеральнай Мунньахха Ыҥырыытын чэрчитинэн ыытылларын санатта.

«Дьиэ атыылаһыытыгар нолуоктан көҕүрэтиигэ эбиилэр киирдилэр — манан сайыамсыкка көмөлөһөр сыаллаах ылыллыбыт госпрограммаларынан туһаммыттар ыарахан финансовай турукка киирдэхтэринэ туһаналлар«, — диэтэ палата председателэ.

Маны сэргэ элбэх оҕолоохтор чэпчэтиилэргэ эбэтэр сорох нолуокка төлөбүртэн көҕүрэтиигэ бырааптарын бигэргэтии арыый судургутуйда. Володин быһаарбытынан, нолуок уоргаттарыгар төрөппүттэр оннуларыгар докумуоннары судаарыстыбаннай тэрилтэлэр боломуочуйалаахтара бэйэлэрэ ыыталлар. Оччотугар элбэх оҕолоохтору кумааҕы толоруутунан соҥнооботтор.

Бырайыакка олоҕуран, МФЦ көмөтүнэн баайга-дуолга, тырааныспарга уонна сиргэ нолуоктарга чэпчэтиилэринэн туһаныыга докумуоннары биэриэххэ сөп. Маны сэргэ сибидиэнньэлэри ылыахха, декларациялары ыытыахха сөп диэн парламентарий чопчулаан биэрдэ.

Госдума спикера иккис ааҕыыга бырайыакка элбэх олус суолталаах көннөрүүлэр киирбиттэрин эттэ. «Олор ортолоругар — «Земскэй учуутал» бырагырааманан көрүллэр төлөбүргэ нолуоктан босхолуохтара. Дьаһал  Россия Президенин көҕүлээһининэн 2020 сылтан саҕаланыаҕа. Бу тыа сиригэр эдэр, саҥа исписэлиистэри олохсутууга уонна дойду үрдүнэн үөрэх хаачыстыбатын тупсарыаҕа«, — диэтэ кини.

Володин эрдэ маннык быһаарыы «Земскэй быраас» бырагыраамаҕа ылыллыбыта диэтэ.

0
0
comments powered by HyperComments