Уһук Илиҥҥэ бэриллэр гектар кээмэйдээх сири таһынан эбии сири анааһыны быһаарар Егор Борисов уурааҕа Саха сирин аграрийдарын өйүөҕэ. Ити туһунан СИА-ҕа өрөспүүбүлүкэ бырабыыталыстыбатын бэрэссэдээтэлин бастакы солбуйааччы э.т. — баһылык уонна бырабыыталыстыба дьаһалтатын салайааччы Юрий Куприянов эттэ.
Федеральнай сокуону дьүүллэһии кэмигэр өрөспүүбүлүкэ ураты харыстанар сирдэрин көмүскээтилэр, ону таһынан сири ылыы бэрээдэгэ балачча судургу буолла.
Социологическай чинчийиилэр түмүктэрэ көрдөрөрүнэн, Саха сирин олохтоохторун баһыйар үгүстэрэ ылбыт сирдэригэр тыа хаһаайыстыбатын сайыннарар санаалаахтар. Сокуон ылыллыан иннинэ фермердэр гектар сир дуона суоҕун туһунан эппиттэрэ.
«Итиниэхэ Егор Борисов уурааҕа көмөлтө буолла. Ол курдук, Уһук Илин гектарын ылбыттарга эбии сир бэриллиэҕэ. Бу докумуон сүрүн сыала-соруга тыа сирин өйөөһүн уонна агропромышленнай комплексы көҕүлээһин», — диэтэ вице-премье э.т.
Куприянов этэринэн, маннык сирдэри тэрилтэлэр буолбакка, биирдиилээн дьон ылыахтара. Фермердэр хаһаайыстыбалара хас да киһилээх буолар. Онон, кинилэр хас биирдиилэрэ эбии сир ылар кыахтаахтар.
