Саха Өрөспүүбүлүкэтин Ил Түмэнэ эһигини Аҕа дойдуну көмүскээччи күннэринэн эҕэрдэлиир!
Быйыл олунньу 23 күнүгэр биһиги Кыһыл аармыйа тэриллибитэ 100 сылын бэлиэтиибит уонна 75 сыл анараа өттүгэр Аҕа дойду Улуу сэриитигэр, Ильмень күөлгэ кыргыһыыга хорсуннук охтубут буойуттары ахтабыт-саныыбыт.
Уол оҕо Ийэ дойдутун көмүскүүр киһи буола улаатан тахсыыта төрөппүттэн эрэ буолбакка, уопсастыбаттан эмиэ тутулуктаах. Өрөспүүбүлүкэбитигэр эр киһи оруолун үрдэтэр, эр киһиэхэ суолта биэрэр үгүс тэрээһин ыытыллар. Аҕа дойдуларын көмүскээбит чулуу буойуттарбытын, саллааттарбытын, аҕаларбытын, эһээлэрбитин ытыктаан, кинилэр ааттарын үйэтитэн, ыччаппытын дойдутун туһугар туруулаһар, күүстээх санаалаах, бөҕө тирэхтээх, бары өттүнэн дэгиттэр кыахтаах гына иитэн таһаарыы — биһиги сорукпут.
Аҕа дойдуну көмүскээччи күнэ — судаарыстыбабыт улуутун, модунун, күүһүн-уоҕун көрдөрөр. Ийэ дойдуга тапталы, бэриниилээх буолууну, эр киһи бэйэтин дьиэ кэргэнин харыстыыр уонна араҥаччылыыр аналлааҕын туоһулуур. Араас омуктары кытта доҕордуу сыһыаны өрө тутар, нус-хас олоҕу хааччыйар, уйгуну-быйаҥы үксэтэр, өбүгэ төрүт дьарыгын салгыыр эр дьоммутунан киэн туттабыт, барҕа махтал тылларын этэбит.
Саха сирин парламена эһиэхэ кытаанах доруобуйаны, үлэҕэ, үөрэххэ үрдүк ситиһиини, олоххутугар дьолу баҕарар.
