Дьокуускайга Саха сирин норуоттарын муусукатын уонна фольклорун музейыгар СӨ култуура үтүөлээх үлэһитэ, норуот маастара Александр Чахов «Эдэр саас ырыалара» диэн ноталаах хомуурунньуга бэчээттэнэн күн сирин көрбүт үөрүүлээх бэлиэтээһинэ буолла.
Долгутуулаах тэрээһиҥҥэ норуот маастарын, муусука инструменнарын оҥорор уран тарбахтаах ытык киһини эҕэрдэлии үгүс киһи муһунна. Ис дууһатыттан иэйэн уһанар, муусука инструменын эт илиитинэн тутан-хабан оҥорор ураты талааннаах ытык киһи матыыптаабыт ырыалара сүрэҕи-быары ортотунан сайа охсон киирэллэрин, өйгө-санааҕа дириҥник иҥэллэрин ыалдьыттар киэн туттан бэлиэтээтилэр.
— Ноталаах хомуурунньугу бэлэмнээһиҥҥэ икки сыл үлэлэстибит. Манна уопсайа 55 ырыа киирдэ. Александр Иванович оройуон, өрөспүүбүлүкэ бэчээтигэр тахсыбыт хоһооннортон сөбүлээбитин, дууһата иэйбитин талан ылан матыыптааһынынан 10 сыл (1965 сылтан 1975 сылга диэри) утумнаахтык дьарыктаммыт, — диир музыковед Мариам Шамаева.
Александр Чахов Таатта улууһун Баайаҕатыгар 1934 сыллаахха төрөөбүт. 1957 сыллаахха Дьокуускайга баянистар куурустарын бүтэрэн баран Мэҥэ Хаҥалас улууһугар Томторго, Төхтүргэ үлэлээбит. Онтон Дьокуускайдааҕы муусука училищетыгар үөрэнэ сылдьан, доруобуйата мөлтөөн тохтуурга күһэллибит. Норуот айымньытын дьиэтигэр методистаабыт. Муусука инструменнарын оҥорор маастар «Биһилэхтээх хомуһа» онтон да атын үлэлэрэ үрдүк сыанабылы ылбыттар. Онтон «Ферма ыалыгар», «Ыһыыга», «Уруй буоллун», о.д.а. ырыалара уостан түспэттэр. Уран уус айар үлэтин хомуурунньуга тахсыбытыттан улаханнык үөрэр.
