Бу ый 22 күнүгэр Шнобель бириэмийэҕэ тиксибиттэри ааттыахтара. Наукаҕа сэдэх уонна көрүдьүөс арыйыылары оҥорбуттар маннык бириэмийэҕэ сылын аайы тиксэллэр. «Чердак» научнай порталга сурулларынан, ХИФУ учуонайдара ынах иигин баһаары утары туттууга анаммыт үлэлэрэ быйылгы наҕарааданы ылыан сөп.
Мастан оҥоһуктары ынах иигинэн сотуу көдьүүһүн ХИФУ преподавателэ Николай Пахомов патеннаан турар. Кини үс сыллаах үлэтэ ынах иигинэн сотуллубут мас хайдыбатын уонна ситэри умайбатын дакаастаабыта.
«2 м уһуннаах, бэйэлэриттэн туох да уратыта суох, биир тэҥ бэрэбинэлэри ыллыбыт. Бииригэр хас да хайаҕаһы оҥордубут уонна ынах иигинэн сотон киирэн бардыбыт. Маны мас үчүгэйдик обордо. Сотору буолан баран мас хаппатын бэлиэтии көрдүбүт. Ону таһынан иигинэн сотуллубатах мастааҕар хайыта барбатын быһаардыбыт. Атын бэрэбинэ тута умайда. Оттон иигинэн сотуллубут мас таһа эрэ умайда. Ол курдук бүтэһигэр тиийэ умайбата», — диэн Пахомов «Наш университет» таһаарыыга биэрбит интервьютугар этэр.
Учуонай мас дьиэ уһуннук сулууспалыырыгар иик көмөлөөҕүн этэр. Ынах иигэ уоту утары субуойустубатын арыйыы таһынан «Чердак» ый туолуута ынах төрүүрүгэр дьайыыта, о.д.а. курдук дакаастаммыт уопуттары бэлиэтиир.
Ig Nobel Prize (Шнобель, Антинобель бириэмийэтэ) – саамай туһата суох чинчийиилэр иһин туттарыллар. Наҕарааданы Марк Абрахамс уонна «Анналы невероятных исследований» сурунаал 1991 сыллаахха олохтообуттара.
