Сотору кэминэн ким баҕалаах уонна кыахтаах Ыйы эргийэ көтөн кэлэр буолуоҕа. Бу туһунан edersaas.ru аах.
Бэҕэһээ SpaceX хампаанньа 2018 сылга Dragon 2 хараабылынан Ыйы тула көтүүгэ туристары кытыннарар былааннааҕын иһитиннэрдэ. Икки бастакы хандьыдаат хампаанньаны кытта сөбүлэһии түһэрсэн, төлөбүр улахан аҥаарын номнуо киллэрбит. Бу 45 сыллаах тохтобул кэнниттэн Сир олохтооҕун ыраах космоска бастакы көтүүтүнэн буолуоҕа.
Хампаанньа Dragon 2 хараабылы айан оҥоруутугар НАСА (АХШ космическай ааҕыныстыбата) үбүнэн көмөлөстө. Астронавтары космос куйаарыгар Falcon ракета таһаарыаҕа.
Маны сэргэ, 2018 сыл бастакы аҥаарыгар хампаанньа Crew Dragon хараабылы норуоттар икки ардыларынааҕы космическай станцияҕа (МКС-ка) ыытыаҕа. Инникитин сылга ортотунан түөрт итинник көтүү оҥоһуллара былааннанар.
Бастакы космос туристара Ыйга Флорида Канаверал тумуһуттан көтүөхтэрэ.
Оттон “Союз” хараабыл туристары илдьэ Ыйы тула көтүүнү 2021-2022 сылларга оҥоруоҕа. Бу туһунан “Энергия” РКК генеральнай дириэктэрэ Владимир Солнцев Новости РИА-ҕа иһитиннэрдэ.
Бу бырайыагынан бастаан “Союз” хараабыл орбитаҕа таһаарыллыаҕа, онтон – анньар күүһүнэн буолар ДП блок. Икки хараабыл космоска тиксиһиэхтэрэ итиэннэ салгыы Ыйга айанныахтара.
“Энергия” салайааччыта иһитиннэрбитинэн, мантан антах “Союз” хараабылынан туристары космоска дьаарбатыы тэриллиэҕэ. Билигин итинник өҥөнү оҥорууга кэккэ хампаанньалары, ол иһигэр Space Adventures-ы кытта, контрактары түһэрсиигэ кэпсэтии ыытыллар. Бастакы көтүү 2021 сылга диэри буолара сабаҕаланар.
АХШ хампаанньалара да, Арассыыйа корпорацията да космоска тахсан дьаарбайыы иһин туристар төһө сууманы төлүөхтэригэр чопчу сыыппараны эппэтэхтэр.
Манна даҕатан эттэххэ, Сир уонна Ый икки ардылара ортотунан 384 467 биэрэстэҕэ тэҥ. 1969-1972 сылларга “Аполлон” бырагырааманан Америка Холбоһуктаах Штаттарын астронавтара алта төгүл Ыйга сылдьыбыттара уонна ситиһиилээхтик эригиллэн кэлбиттэрэ. Олор билиҥҥээҥҥэ диэри киһи-аймах историятыгар ыраах космоска бастакы көтүүлэринэн буолаллар.
