Үгэскэ кубулуйбут сыл аайы тэриллэр Ыччат ыһыаҕа быйыл бэс ыйын 30 күнүттэн от ыйын 2 күнүгэр диэри Мирнэй куоракка ыытыллыа. Манна «Боотурдар оонньууларыгар» саха многоборьета икки ыйааһынынан барыаҕа.
75 киилэҕэ диэри ыйааһыннаах боотурдар «Урааҥхай Уолан» аатын сүгэр туһугар алта көрүҥҥэ — мас тардыһыыта, хапсаҕай, үс төгүл үс, 400 миэтэрэҕэ сүүрүү, тутум эргиир, таас көтөҕүүтэ — күрэс былдьаһыахтара. Оттон 75 киилэттэн үрдүк ыйааһыннаах аарыма боотурдар «Эр Бэрдэ» аатын биэс ыараханы көтөҕүүлээх — сыарҕа соһуута, Чуона таастара, илии күүһэ, балаҕан нөҥүө таас быраҕыы, таас көтөҕүү — көрүҥнэргэ быһаарыахтара.
Кыайыылаах «Урааҥхай Уолан» уонна «Эр Бэрдэ» 150-нуу тыһыынча солкуобайынан наҕараадаланыахтара. Атын миэстэлэспит уолаттар эмиэ сыаналаах бириистэри бэлэх тутуохтара.
Ыччат ыһыаҕар кыайбыт боотур үрдүк таһымнаах күрэхтэһиилэргэ бэйэтин холонор. Ол курдук, ааспыт сыллары ылан көрдөххө, многоборьеҕа кыайбыт бөҕөстөр «Дыгын оонньуутун» түһүлгэтигэр ситиһиилээхтик кытталлара бэлиэтэнэр.
Алексей Кутуков — Ыччат ыһыаҕын 2010 сыллааҕы күрэхтэһиитин муҥутуур кыайыылааҕа, Дыгын оонньуутун 2015 сыллааҕы чөмпүйүөнэ.
Артем Варданян — Ыччат ыһыаҕын 2015 сыллааҕы кыайыылааҕа, 2016 сыллаахха «Дыгын оонньуутун» боруонса призера.
Петр Старостин — Ыччат ыһыаҕын 2011 сыллааҕы кыайыылааҕа , «Дыгын оонньуутун» 2014 сыллааҕы муҥутуур кыайыылааҕа, 2015 сыллааҕы «Дыгын оонньуутун» үрүҥ көмүс призера.
Алексей Иванов — 2015 сыллааҕы Ыччат ыһыаҕын үрүҥ көмүс призера, 2017 сыллааҕы «Дыгын оонньуутугар» кыттар путевка хаһаайына, 2015 сыллааҕы «Күүстээх Бөтүү» саха пятиборьетын 70 киилэҕэ диэри кыайыылааҕа.
