Өрөспүүбүлүкэ сорох улуустарыгар ыксаллаах быһыы-майгы үөскээн, Хаҥалас «Орто Дойду» комплексыгар буолуохтаах Ыччат ыһыаҕа быйыл ыытыллыа суоҕа.
«Өрөспүүбүлүкэбитигэр маннык тыҥааһыннаах быһылааннар тахса турдахтарына, дьон дьиэтэ-уота суох хаалбыт балаһыанньатыгар биһиги бырааһынньыктыырбыт, ыһыах ыһарбыт сатаммат. Билигин бары күүспүтүн чөлүгэр түһэрии үлэтигэр ыытыахха, ыһыах харчытын халаан уутуттан эмсэҕэлээбит оройуоннарга аныахха»,- диэн көхтөөх ыччат Ыччат ыһыаҕын иилээн-көҕүлээн ыытар хамыыһыйаҕа биллэрдэ. СӨ бырабыыталыстыбатын бэрэссэдээтэлин солбуйааччы Михаил Гуляев салайааччылаах тэрийэр хамыыһыйа бу этиини өйөөтө, онон ыһыах кэлэр 2019 сыл бэс ыйыгар Хаҥаласка ыытыллыаҕа.
Манна диэн эттэххэ, быйылгы Ыччат ыһыаҕа Хаҥалас улууһун Өктөм нэһилиэгиттэн чугас турар «Орто Дойду» комплекска ыытыллыахтаах этэ. Бэлэмнэнии үлэтэ номнуо бара турбута. Өктөмҥө, бүтэһик дааннайдарынан, 292 киһи олорор 82 дьиэтэ ууга барбыта. edersaas.ru
This post was published on 22.05.2018 19:02 19:02