«Мин Ил Дарханым», «Руки прочь от Ил Дархана», «Егор Борисов — наш лидер» диэн хештегтээх сурук, хаартыска бүгүн социальнай ситими толордо. Бу — эдэр дьон санаатын тиэрдэр, Ил Дархан Егор Борисовы өйүүрүн биллэрэр, түмсэргэ ыҥырар ньымата. Кэлиҥҥи кэмҥэ интернеккэ дьону бутуйуу, күөртээһин хойунна. Олорго ыччаппыт маннык хоруйдаата.
«БОРИСОВ КРУТ!»
#БорисовКрут диэн акцияны Устудьуоннар этэрээттэрин Саха сиринээҕи салаата иилээтэ-саҕалаата. «Егор Борисов Саха сирин сайдыытыгар олус элбэҕи оҥорор. Бу акциянан биһиги Ил Дархаммытын өйүүрбүтүн, ытыктыырбытын, кини үтүө аатын хаһан даҕаны тэбистэриэ суохпутун биллэрэбит«, — дииллэр байыастар.
Салгыы «Саха КВН» уопсастыбаннай тэриллии, «Дьулуур» оҕо биир сомоҕо хамсааһына, эдэр суруналыыстар, учууталлар кыттыстылар. Акция салҕанан, тэнийэн барда.
«Ыччат сарсыҥҥыга эрэллээх, өйө-санаата бигэ, айарга-тутарга бэлэм! Онуоха, биһиги санаабытыгар, өрөспүүбүлүкэ салалтатын өттүттэн эдэр дьон сайдарыгар, олоҕун оҥосторугар уонна үөрэнэригэр-үлэлииригэр бары кыах бэрилиннэ! Бу баар – эрэллээхтик сайдыыга сөптөөх суол! Астынабыт уонна киэн туттабыт Аҕа баһылыкпыт биһиги көҕүлээһиннэрбитин өйүүрүттэн, биһигини кытта тэҥҥэ хардыылырыттан!«, — диэн бэйэлэрин өйөбүллэрин квнщиктар биллэрдилэр.
Оонньоон бүтүҥ! Батсаапка маннык ис хоһоонноох акция-сурук хаартыскалары кытта тэҥҥэ тарҕанна. Сурук ис хоһоонун кытта сөпсөһөр киһи анныгар бэйэтин аатын, куоратын, улууһун суруйан салгыы ыытар. Акцияны Гражданскай уопсастыбаны сайыннарыы миниистирин бастакы солбуйааччы Савва Михайлов саҕалаата.
«Дьиҥэр, көҥүл сылдьан санааны этэр чэпчэки да буолааччы. Судаарыстыбаҕа сулууспалыы сылдьан этинэргэ арыый уустуктардаах эбит. Сокуонунан кими эрэ, тугу эрэ киэҥ араҥаҕа таһааран хайҕыыр эбэтэр сэмэлиир хааччыллар. Ол эрэн тулуйарбыттан ааһан аһаҕастык ТУС санаабын этиниэхпин баҕардым.
Аан-дойду оргуйан олорор кэмигэр, Россия ийэбитигэр террор, санкция кимэн киириилэригэр биһиги эрэ буккулла сылдьабыт. Дьон-норуот өйдөнөн сомоҕолоһор кэмигэр биһиги, дьэ, уоспутун чорботон бэйэ-бэйэбитин үөхсэртэн бокуой булбаппыт. Ити демократия кыайыыта буолбатах, ити норуот инникитин сарбыйыы буолар.
Кыһыл тыллаахтар көҥдөй куолулаан дьону дьоҥҥо утары туруорар үлэни ыыталлар. Уһун тыллаахтар бэйэлэрин эрэ көрүнэллэр. Норуокка хаһан наадыйбыттарай? Дьэ, улахан дуоһунастан уурайан баран «оппозиция» буолбуттар. Дьэ, норуот туһугар харахтара аһыллыбыт. Итэҕэйэҕит? Суоҕа чахчы.
Экология диэн ис хоһоонунан көҥүл ылан баран политикаҕа кубулуттулар. Сымыйаны уруйдаатылар, албыны үөһэ туттулар.
Нууччаларга «сутяжниктар» диэн тиэрмин баар. Бу профессиональнай кириитикээннэр, бары барытыгар итэҕэһи-быһаҕаһы көрдүүр дьон. Мин холобур кинилэри кытта хас да төгүл көрсөн турабын, тэрээһиннэргэ тыл да биэрэрбит. «Конструктивнай этиилэргитин» олоххо киллэриэххэ, куолуттан тэйэн үлэлиэххэ диэн. Түмүгэ ити сылдьар, болҕомтоҕо наадыйбатылар, дьону болуоссакка албыннаан мустулар.
450 тыһыынча ахсааннаах саха норуота (Россия таһымыгар олох аҕыйах) дьиҥинэн сүрдээх түмсүүлээхпит, ону биһиги аһара улахан территориябыт, баай культурабыт, биир күүстээх санаабыт көрдөрөр. Ол эрэн ити дьоннор ону ыһарга сананнылар.
Төһөлөөх элбэх ситиһии баарый, төһөлөөх элбэх кыайыы баарый, ол ону көрө да сатаабаттар, биир кэм итэҕэстэри-быһаҕастары сырсаллар. Ама оннук дьоҥҥо дойдум, норуотум дьылҕатын эрэниэм дуо? Кэбис. Дьиҥ норуот сомоҕото бу биһиги түөлбэлэрбит, нэһилиэктэрбит, улуустарбыт дьоно-сэргэтэ. Биһиэхэ туох да алдьархай, бэрт былдьаһыы тахсыбатын ситиһиэхпит.
«Сомоҕо күүс» диэн ааттаммыттар. Ол партияларын, түмсүүлэрин үстүүтэ-түөртүүтэ уларыта сылдьар дьон, санааларын күҥҥэ сэттэтэ уларытар дьон, араас хара дьыалаларга эппиэттээбит, дьону-норуоту кытта биир тылы булбатах дьон ханнааҕы сомоҕолоро кэлиэй? Туох күүстээхтэрий? Күүстэрэ дьону албынныыларыгар дуо? Кураанаҕы куолулуулларыгар дуо? Кэбис оонньоон бүтүн!
Тоҕо санааҕытын кэлэн атах тэпсэн олорон кэпсэппэккит? Тоҕо өрөспүүбүлүкэ сайдыытыгар атын общественнай хамсааһыннар курдук үлэлээбэккит? «Сомоҕолор» кэлиҥ, кэпсэтиэххэ. Норуот санаатын бутуйан бүтүҥ!
Норуот, общественность уонна ыччат Ил Дархан уонна сахабыт норуоттарын тула түмсэбит, түмсэ да туруохпут, ол буолар — дьиҥнээх норуот күүһэ!
Биир дойдулаахтаргытын кыыһырдыман, дьон-сэргэ Өрөспүүбүлүкэ интэриэһин көмүскээн турдаҕына хорооҥҥутуттан тахсыа да суоххут.
Үөрэрим диэн ыччат дуоспурумнаах, мээнэҕэ кыһаллыбат буолла. Дойдутугар долгуйар ыччаттардаах Сахабыт сирэ инникилээх!
Бэйэбит ис турукпутун уонна проблемабытын бэйэбит быһаарса үөрэниэххэ. Ити «сомоҕолор» Москубаҕа үҥсэ оонньообуттара кыбыстыылаах, хомолтолоох. Норуот баһыйар куолаһынан талбыт былааһын убаастааҥ, эһиэхэ аҕыйах куолуһукка ыстарыа суохпут!
Толкуйдаан, түмсэр кэммит дьэ тиийэн кэллэ.
Омугуттан, улууһуттан, баартыйатыттан тутулуга суох бары бииргэ буолуохха!»
Савва Михайлов, Дьокуускай куорат.
(сөбүлэһэр буоллаххына ааккын суруйан баран атын группаларга ыыт)
#МинИлДарханым #БорисовКрут #рукипрочьотилдархана #ЕгорБорисовнашлидер
