Бу күннэргэ Дьокуускай куорат олохтоохторо ким туох кыахтааҕынан: харчынан, таҥаһынан, аһынан-үөлүнэн халааҥҥа эмсэҕэлээбит Амма улууһун дьонугар көмөлөһөллөр.
edersaas.ru
Киин куоракка хас да көмө оҥорор штаб тэрилиннэ. Онтон биирдэстэрэ — «Сахамедиа» холдинг «Эдэр саас» интернет-таһаарыы, СӨ Ыччат дьыалаларын уонна дьиэ кэргэн бэлиитикэтин министиэристибэтэ уонна Ыччат бырабыыталыстыбата тэрийбит холбоһуктаах штаба. Дьокуускай куорат Ордожоникидзе уул. 10 №-дээх дьиэтигэр штаб ыам ыйын 14 күнүттэн 18 күнүгэр диэри 14.00-18.00 ч. үлэлиир.
«Лидер» ыччат көҕүлээһинин өйүүр киинтэн штабка гуманитарнай көмөҕө эппиэттээх Василий Давыдов (сот. төл.+7 (965) 995-34-61) иһитиннэрбитинэн, күн аайы дьон штабка итии таҥас, ас аҕалаллар.
— Эдэриттэн эмэнигэр диэри үгүс киһи кэлэн барда. Бэҕэһээ 82 саастаах Евдокия Белолюбская итии таҥаһы кытта 3000 солк. аҕалан туттарбыта. Оскуола оҕолоро курууппа, макарон астары аҕалан биэрбиттэрэ. Хас биирдии көмө оҥорбут дьон аатын, тугу аҕалбытын суруйан иһэбит уонна куулга хаалаан баран, Амма штабыгар тиийэн туттарабыт, — диэн кэпсиир Василий Давыдов.
Мин сылдьар кэммэр СӨ Киһи быраабын араҥаччылыыр аппараатыттан уон куул бурдук, биир куул хортуоппуй аҕалан биэрдилэр. Хас биирдии штабтан кэлбит куул, мал, ас-үөл Амма улууһун штабыгар мунньуллар. Билигин Өлүөнэ эбэ мууһуттан ситэ босхолоно илик буолан, сырыы-айан тохтоото. Ол кэмҥэ мунньуллубут таһаҕаһы барытын Цииркэ дьиэтигэр мустулар.
Амма улууһун штабын гуманитарнай пуунугар эппиэттээх Саргылаана Леонтьева гуманитарнай штаб үлэтин туһунан бу курдук кэпсиир:
— Дьокуускайга тэриллибит штабтар бары бэрт тэрээһиннээхтик үлэлии тураллар. Амма улууһун штаба иһиттиннэрбитинэн, дьон сүрүннээн ороҥҥо, быстах туттарга олоппоско, остуолга, туумбаҕа наадыйар. Бу кыһалҕаны өйдөөн, тээбирин аҕалар дьон бааллара хайҕаллаах суол.
Дьиэлэриттэн тапочканан эрэ куотан тахсыбыт дьон бааллар. Амматааҕы штаб мантан хомуллубут кууллары наардаан, итии таҥаһы, аһы-үөлү нэһилиэктэринэн испииһэгинэн түҥэтэр.
Халааҥҥа эмсэҕэлээбит дьоҥҥо көмөлөһүөн баҕалаах олус элбэҕиттэн үөрдүбүт. Дьоммут, Амма улууһун дьоно-сэргэтэ махталлара муҥура суох. Хас биирдии гуманитарнай көмө испииһэккэ киллэриллэн учуоттанан иһэр. Бу докумуон малы кытта Амма улууһугар барар.
Бу күннэргэ маннык гуманитарнай штабтары Таатта, Уус Маайа, Хаҥалас уонна Томпо улуустарын землячестволара эмиэ тэрийдилэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.
