30 Кулун тутар 30.03
  • -15°
  • $ 92,37
  • 99,53

Ыччат бестселлерин ааптара Меган Вернер Дьокуускайга кэллэ

10:20, 19 апреля 2017
Текст:
Читайте нас на
Яндекс Новости
ЯДВ

“Барыта бэйэҕиттэн тутулуктаах” (“Все зависит от тебя”) кинигэни суруйан ыччат кумира буолбут Соҕуруу Африка Өрөспүүбүлүкэтиттэн сылдьар 15 саастаах Меган Вернер бу күннэргэ Дьокуускайга ыалдьыттыыр.


Кыысчаан, кэнники кэмнэргэ үлэтин өссө киэҥ далааһыннаабыт Евразийскай Айар Гильдия (Лондон) тэрийиитинэн уонна Саха сирин Суруйааччыларын сойууһун салайааччы, V Евразийскай литературнай бэстибээл лауреата, саха норуодунай поэта Наталья Харлампьева ыҥырыытынан кэллэ.

Меган айар үлэтин биллиилээх предприниматель, суруйааччы Роберт Кийосаки (АХШ)  – “Богатый папа, Бедный папа” бестселлер ааптара, бэрт үрдүктүк сыаналаабыта уонна бу кыыс – аан дойду ыччатыгар холобур  буолар, диэбитэ.

Кырдьык, бу курдук бүттүүн глобализация уонна сайдыылаах технология үйэтигэр, ордук, улаатан эрэр улдьаҕай саастаах оҕолор ортолоругар куттал суох буолуутун кыһалҕата күннэтэ сытыырхайдар-сытыырхайан иһэр. Оннооҕор, ыраата барбакка холобурдаатахха, бу кэнники кэмҥэ,  «Синий кит» курдук онлайн оонньуулар киминэн эрэ киэҥник тарҕатылла сатыыллар…

Дьэ, маннык түгэннэргэ Меган курдук ааптардар айымньылара оҕолорго көмөҕө кэлиэхтэрин сөп. Меган Вернер бэйэтин олоҕуттан холобурдары аҕалан, араас кыһалҕалары быһаарар суоллары булан, оҕолорго көрдөрөр. Кини бу кинигэтигэр киһи бэйэтин олоҕун тупсарарыгар баар 7 ньыма туһунан итэҕэтиилээхтик суруйар.

Меган Вернер Дьокуускайга кэлээт, муус устар 18 күнүгэр, аан бастакынан Национальнай гимназия үөрэнээччилэрин кытта көрүстэ.

—Бэйэтин саастыылаахтара, 8-с, 9-с, 10-с кылаастар оҕолоро көрсүһүүгэ сырыттылар. Иккис кылаас үөрэнээччитэ Айкуо Контоева хомуска оонньоон, эҕэрдэлии көрүстэ. Меган олус аһаҕас, коммуникабельнай, кэрэ кыыс эбит. Ситиһиилээх модель. Оҕолору кытта тута уопсай тылы булла. Кинигэтэ психологическай, нууччалыы тылбаастаммытын, английскайдыытын даҕаны биһиги оҕолорбут атыылаһан, Мегантан автограф ыллылар.

Кини саҥа доҕотторугар, мотивационнай тренер быһыытынан, оонньуу ыытта. Оҕолор көхтөөхтүк кытыннылар. Тылбаасчыттаах. Онон, английскайдыы да, нууччалыы да көҥүл кэпсэттилэр. Кыыс ыйытыыларга хоруйдаата уонна оҕолор өссө биир-биир, олус истиҥник сэһэргэстилэр. Меганы ийэлээх-аҕата арыаллыы сылдьаллар.

Биһиги гимназиябытыгар психология нэдиэлэтэ бара турар, онон, эдэр ааптар Меган Вернеры кытта көрсүһүү бэрт тоҕоостоох буолла, — диэтэ дириэктэри иитэр-үөрэтэр үлэҕэ солбуйааччы Светлана Гоголева.

Национальнай гимназияҕа. Хаҥастан иккис — Меган Вернер.

Муус устар 19 күнүгэр Меганныын көрсүһүү Национальнай библиотекаҕа буолуоҕа, ону таһынан суруйааччы кыыс салгыы Дьокуускай 33-с оскуолатын итиэннэ Музыка Үрдүкү оскуолатын үөрэнээччилэрин кытта көрсүһүөҕэ.

edersaas.ru

Следите за самым важным и интересным в Telegram-канале и WhatsApp-группе ЯСИА