Үгэс быһыытынан, бөҕөстөргө саҥа сезону аһар Иван Ярыгин кэриэһигэр Гран-при турнир өйүүҥҥүттэн, тохсунньу 27-тэн, Красноярскай куоракка саҕаланар.


Быйылгыттан Иван Ярыгин турнира Тустуу аан дойдутааҕы түмсүүтүн (UWW) рейтинннээх турнирдарын ахсааныгар киллэриллибитинэн, Арассыыйаттан ыйааһын ахсын биэстии киһи тустар буолла. Күрэхтэһии өссө биир уратытынан ыйааһыннар ахсааннара эбиллибитэ буолар. Урукку сылларга аҕыс ыйааһыҥҥа күрэс былдьаспыт буоллахтарынан, бу сылтан уон ыйааһыҥҥа тустуохтара.

2018 сыл тохсунньу 1-тан күүһүгэр киирбит UWW саҥа регламенынан, ыйааһыннарынан хапсыһыылар икки күн буолуохтаахтара. Ол эрээри, Красноярскайдааҕы түһүлгэни тэрийээччилэр уруккулуу, биир күнүнэн ыытыахпыт дииллэр.

Билиҥҥитэ бу күрэхтэһиигэ Саха сириттэн соҕотох бөҕөс – Олимпийскай эрэл училищетын иитиллээччитэ Семен Владимиров кыттара биллэр. Арассыыйа былырыыҥҥы үрүҥ көмүс призера Виктор Рассадин кыттарын-кыттыбатын туһунан чуолкай информация суох.

Дойду спортивнай тустууга федерациятын сайтыгар иһитиннэрбиттэринэн, биллэр-көстөр бөҕөстөр Сослан Рамонов итиэннэ Ануар Гедуев Иван Ярыгин турнирыгар сүүмэрдээһини кыайан ааспатахтар.

Дьахталлар күрэстэһиилэригэр өрөспүүбүлүкэтээҕи Спорт үрдүкү маастарыстыбатын оскуолатыттан Алина Казымова (57кг) уонна Нерюнгриттан төрүттээх Ирина Афанасьева (59кг) тусталлара күүтүллэр.

0
0
comments powered by HyperComments