Ыам ыйын 22 күнэ — Саха Өрөспүүбүлүкэтигэр Сайылык күнэ. Саха халандаарынан сайыҥҥы күн ааҕыллар. Кэҕэ этэр. Уһун кыһыны этэҥҥэ туораан, күөххэ үктэнэр Ньукуолун күнүгэр алаадьы астаан сири-уоту аһаталлар, Айыылартан өҥ дьыл буоларыгар көрдөһөллөр, ыраастаналлар уонна сайылыкка көһөллөр.


Саха сиригэр тыа хаһаайыстыбатын сайыннарыыга улахан болҕомто ууруллар. 2018 сыллаахха сэтинньигэ Ил Дархан Айсен Николаев ыам ыйын 22 күнүгэр Сайылык күнүн бэлиэтииргэ уураах таһаарбыта. Онон, бүгүн Сайылык күнүн бэлиэтиибит.Өрөспүүбүлүкэ үрдүнэн 400-чэ сайылык баара биллэр. Олортон 200-тэн тахсата сайыҥҥы үүт пиэрмэлэрэ буолар.

Аан дойдуга хамсыыр харамай эгэлгэтин күнэ. ХНТ Генеральнай Ассамблеятын 55-с сиэссийэтигэр Хамсыыр харамай эгэлгэтин Конвенциятын ылыныы кэмигэр биллэриллибитэ (ыам ыйын 22 күнэ 1992 с., Найроби).

🔹1856 — Москубаҕа Третьяковскай галерея тэриллибит.

🔹1862 — Арассыыйа импиэрийэтигэр «Хайа биистэрин бүтэһиктээхтик бас бэриннэрэргэ … Хапхаас сиһин арҕаа өттүгэр Кубаан казаактарын уонна Арассыыйа атын олохтоохторун олохсутар туһунан» балаһыанньа тахсыбыт.

🔹1863 сыллаахха ыам ыйын 22 (эргэ истиилинэн ыам ыйын 10) күнүгэр Дьокуускайы улахан халаан уута ылбыт. Бастаан куорат соҕуруулуу-арҕаа өттө ууга барбыт. Икки хонугунан намыһах сиргэ турар дьиэлэр сарайдарыгар диэри ууга барбыттар, даллар отой көстүбэт буолбуттар.

🔹1927 — Кытайга Синиин куоратын таһыгар 8.3 магнитудалаах улахан сир хамсааһына буолбут. Манна 200 тыһыынчаттан тахса киһи өлбүт, онон аан дойду историятыгар саамай алдьатыылаах сир хамсааһыннарыттан биирдэстэрэ буолар.

🔹1952 — Саха АССР Миниистирдэрин сэбиэтэ «Дальстройга 200 аты уонна 30 тыһыынча табаны атыылыырга» уураах ылбыта.

🔹1960 — «Чиилитээҕи улуу сир хамсааһына» — 9.5 магнитудалаах аан дойду устуоруйатыгар саамай модун күүстээх сир хамсааһына буолбут. Мантан үөскээбит цунами Соҕуруу Америка кытылыттан Чуумпу далай бары муннугар диэри тиийбит.

🔹1982 — Баасктар сирдэригэр Иккис коррика саҕаламмыт — бааск омук тылын өйүүр эстафета. Манна бааск омуктар олохсуйбут сирдэринэн 2 нэдиэлэ тухары тохтоло суох дьон уларытыһа-уларытыһа сүүрэр. Ким да кыайыылаах аатырбат. Бырааһынньык курдук буолар.

🔹1990 — Ойуунускай аатынан Судаарыстыбаннай бириэмийэ үс киһиэхэ туттарыллыбыт: суруйааччы Рафаэль Баҕатаайыскайга, композитор Валерий Кацка, бэйиэт Михаил Тимофеевка.

Төрөөбүттэр:

🔸1890 — Эдьигээн улууһун Хатыҥ нэһилиэгэр эбэҥки дьиэ кэргэнигэр 117 сааһыгар диэри олорбут уһун үйэлээх Саха сирин олохтооҕо Варвара Семенникова төрөөбүт.

🔸1906 — билиҥҥиннэн Үөһээ Халымаҕа Нээлэмнэй остуойба аттынааҕы Оттуур Күөл диэн сиргэ Николай Спиридонов — Тэки Одулок (17.03.1938 өлб.) — бастакы дьүкээгир суруйааччыта, учуонайа.

🔸1921 — Үөһээ Бүлүү Оҥхойугар оһуохайдьыт, тойуксут Николай Егоров — Нукутта.

🔸1939 — Өлүөхүмэ Кыыллааҕар Зоя Корнилова — саха бэлиитигэ, СӨ Госдуумаҕа дьокутаата, Ил Түмэн дьокутаата, экономика билимин хандьыдаата.

Өлбүттэр:

🔹1885 — француз суруйааччыта Виктор Гюго.

https://sah.wikipedia.org/wiki/Спиридонов_Николай_Иванович_(Тэки_Одулок)

https://sah.wikipedia.org/wiki/Ыам_ыйын_22

Сигэн:

1
0

3 САНАА

  1. Уопсайынан Кыыллаахха 20-с үйэ ортотугар күүстээх дьахталлар үөскүүллэр эбит дии санаатым.
    Аҥардас 1 ый иһигэр бу рубрикаҕа 3 дуу 4 дуу дьахтар ахтылынна. Оскуола өҥөтө буолуо дуо?

    Эр киһи буоллаҕына, суох… Биир эмит аатырбыт Өлүөхүмэ Кыыллаах Арыытын эр киһитин билэҕит дуо?

  2. Ыам ыйын 22 күнэ — Араан Арчы хотун орто дойду түөрт бадьыр баҕанатыгар сүр сардаҥатын түһэрэр кэмэ.

    Өбүгэлэрбит этэллэринэн түөрт бадьыр баҕана Орто дойду түөт саҕаҕын тутан тураллар.
    Арчы — сүр сардаҥата.
    Оттон Араан Арчы хотун — арчыны ыам ыйыгар Орто дойдуга түһэрэр дьөһүөлдьүт.

    Бу күн былыр Ыһыахха бэлэмнэнии 40 хонуктаах туома саҕаланара. Оннук бэлэмнэнэн эрэ баран Улуу Тунаҕы (күн сайыҥҥы туруута, летнее солнцестояние) көрсөллөрө.

  3. Саҕаланара диэн алҕас суруйбуппун.
    Салҕанара үһү.
    40 эбэтэр 49 (ол аата сэттэ төгүл сэттэ) хонук иннинэ саҕаланар үһү.
    Бүгүн ол 49 хонуктаах туомтан сүрүн туома оҥоһуллар эбит.

Хоруйдаа

Лимит времени истёк. Пожалуйста, перезагрузите CAPTCHA.