Өрөспүүбүлүкэ бырабыыталыстыбата “Якутия” авиахампаанньа саҥа салалтатыгар хампаанньаны уонна үлэһиттэри, бастатан туран, көтөр састаабы оннунан хаалларыахтаах диэн соругу туруорар. Бу туһунан Саха сирин тырааныспарка уонна суолга хаһаайыстыбатын миниистирэ Александр Тарасов эттэ. Ольга Федорова бу дуоһунастан барыытын туһунан этэригэр миниистир кини авиахампаанньаны чөл хаалларар туһугар үгүс үлэни ыыппытын аҕынна.
“Ольга Николаевна хорсун дьахтар. Маннык ночооттоох тэрилтэни эр да киһи салайарга ылыныа суоҕа этэ. Авиахампаанньа мөлтөөбөтүн туһугар үгүһү оҥордо, ол эрээри балаһыанньаны чөлүгэр түһэрэр кыаллыбата. Ол иһин салалтаны уларытыы тирээтэ, онон бүгүн хампаанньаҕа экэнэмиис буолбакка, авиационнай салааҕа үлэлээбит уопуттаах киһи наада”, — диэн бэлиэтээтэ кини.
Бу солоҕо анаммыт Владимир Горбунов, Тарасов этэринэн, хампаанньа үбүн туругун уонна соруктарын билэр. Саҥа генеральнай дириэктэр Дьокуускайга сарсын көтөн кэлиэҕэ.
