Норуоту сомоҕолуур, түмэр Ыһыахтар кэмнэригэр куонкурус, күрэстэһии арааһа тэрилиннэ. Улахан бириистэрдээх боотурдар оонньуулара маныаха сүрүн миэстэни ылыахтарын ылаллар. Бу күрэхтэһиилэртэн тэбинэн спортсменнар уйгуларын улаатыннардылар. СИА кинилэртэн саамай элбэх үбү-харчыны сомсон ылбыт биэс бастыҥы бэлиэтиир.
- Евгений Алексеев (~ 575 000 солк.)
«Халдеев Мемориалыгар» чулуулар: Семен Семенов, Игорь Софронеев, Дмитрий Шадрин, Платон Саввинов уонна Увар Тимофеев киниэхэ хотторуохтара диэн ким да таайан да, сэрэйэн да көрбөтөҕө. Албан ааттаах, суон сурахтаах бөҕөстөрү кыайан, кини саҥа «Ниссан-Альмера» массыыналанна (550 тыһ. солк). Туймаада Ыһыаҕар Алексеев муҥутуур чөмпүйүөн аатын ылла. Бирииһэ Matrix бэлэссипиэт (15 тыһ. солк).
2.Артем Варданян (~ 650 000 солк.)
Нам эдэр, кэскиллээх спортсмена Артем Варданян сыл саҥа арыйыыта буолбута кыратык да саарбахтаммат. Төрөөбүт Намын Ыһыаҕар Алексей Кутуковы кыайан, сүрүн бирииһи «УАЗ-микроавтобуһу» ылла (быһа холуйан 550 тыһ. солк). Варданян Дыгын Оонньууларыгар үс бастыҥ ахсааныгар киирэн үгүстэри сөхтөрдө. Манна кини 100 тыһ.солк. наҕараадаланна.
- Николай Николаев (~ 650 000 солк.)
Бүлүү улууһун аатыттан ыһыллар Ыһыахтарга кыттыбыт Николай Николаев «Бүлүү Боотуругар» кыайыы көтөллөнөн, «УАЗ-Хантер» массыыналанна (орто сыаната — 500 тыһ. солк.). Атын Ыһыахтарга уопсайа 150 тыһ.солк.: 50 — Дьөктөм нэһилиэгин Ыһыаҕар, 100 —«Дуоҕа боотура» турнирга ылла.
- Рустам Ксенофонтов (~ 1, 015 000 солк)
Эргиччи дьоҕурдаах универсал, бөҕө-таҕа көрүҥнээх Рустам Ксенофонтов (192 см үрдүктээх, 118 кг ыйааһыннаах) Чурапчыга «Тоҕус томтор оонньууларыгар» саҥа «Нива — 2121» массыыналанна (быһа холуйан 400 тыһ.солк.). Олоҥхо Ыһыаҕар үһүс төгүлүн тэҥнээҕин булбата, онно кини 300 тыһ.солк. ылла, оттон оҕунан ытыыга бастыыр иһин күрэхтэһиигэ — 250 тыһ.солк.
- Егор Филиппов (~ 1,450 000 солк).
Егор Филиппов үбү-харчыны барыларыттан элбэҕи сомсон ылла. Хаҥаластан төрүттээх пауэрлифтер спорду сэҕээрээччилэр болҕомтолорун эргийэр киинигэр турда. Кини ситиһиитэ Сунтаар улууһуттан саҕаламмыта. Кини манна кыайан 400 тыһ. солк. «сиэбигэр угунна». Дыгын Ооньууларыгар кыайыылаах үрдүк аатын ылан, «УАЗ-Хантер» массыыналанна (орто сыаната 500 тыһ.солк). Итини таһынан кини 100 уонна 200 тыһ.солк. суумалаах сертификаттары тутта. Үөһээ Дьааҥыга Филиппов чөмпүйүөн ааты-суолу таһынан 250 тыһ. солк. ылла.
«Кинилэр хас биирдиилэрэ дьоһун хайҕабылы ылыахтарын эрэ сөп. Өр кэмнээх, сыраны-сылбаны эрэйэр, дьулуурдаах дьарыгынан эрэ кыайыы кэлэр. Кинилэр сылы быһа эрчиллэллэр, онон сыаналаах бириистэри сүүйэллэрэ мин саныахпар, сөптөөх. Кистэл буолбатах, билигин эт-хаан өттүнэн кыахтаах эрээри, сордунан дьарыктаммат уолаттар элбэхтэр. Биһиги кинилэри норуот инникитин туһугар спортка кэлэллэрин, чөл олохтоох буолалларын ситиһиэхтээхпит», — диэтэ Баһылай Манчаары аатынан спорт национальнай көрүҥнэрин дириэктэрэ Иннокентий Григорьев.
