Өрөспүүбүлүкэ Судаарыстыбаннаһын күнүгэр Федерация Сэбиэтин чилиэнэ Вячеслав Штыров Томпотооҕу-Тааттатааҕы быыбардыыр уокуруктан норуодунай дьокутаат Виктор Лебедевы уонна Томпо улууһун баһылыга Яков Степановы кытта оробуочай көрсүһүүтэ буолла. Кинилэр оройуон сайдыытын дьүүллэстилэр.

Саҥа талыллыбыт дьокутаат Виктор Лебедев Вячеслав Штыровка быыбар хампаанньатын түмүктэрин, Таатта уонна Томпо олохтоохторун туруорсууларын туһунан кэпсээтэ. Яков Степанов оройуон ситиһиилэрин уонна кыһалҕаларын туһунан кэпсээтэ.

Дьокутааты уонна баһылыгы истэн баран, Вячеслав Анатольевич Томпо хайа-бырамыысыланнай оройуонун сайдыытын бырагырааматын толорууга болҕомтолоохтук сыһыаннаһарга сүбэлээтэ. Сенатор маныаха уот кыамтата мөлтөҕүн сүрүн кыһалҕанан ааттаата. Онон сибээстээн, Хаандыгаҕа дьоҕус ТЭЦ тутар наадатын эттэ. Штыров саныырынан, бу тутулуннаҕына, хас да кыһалҕа быһаарыллыаҕа. Ол курдук, нэһилиэнньэни сылааһынан уонна уотунан толору хааччыйыахтара. Ону тэҥэ Дьабарыкы Хайа таас чоҕун батарыы кыаллыаҕа.

Маны сэргэ сенатор баһылыкка Хаандыга бөһүөлэгин тула быһыты оҥоруу боппуруоһунан дьарыктанарыгар сорудахтаата. Халаан уутуттан көмүскэнэр туһуттан маннык бырайыагы олоххо киллэриэххэ диэн санаалаах.

Вячеслав Штыров Хаандыга саахалланар туруктаах дьиэлэрин федеральнай бырагыраамаҕа киллэрэргэ күүскэ үлэлииргэ ыҥырда. Ону тэҥэ гимназия уонна бибилэтиэкэ дьиэтин тутуу боппуруоһун.

Өрөспүүбүлүкэ парламенын экономическай, инвестиционнай уонна бырамыысыланнай бэлиитикэтигэр кэмитиэт чилиэнин быһыытынан Виктор Лебедев туруоруллубут боппуруостары олоххо киллэриигэ көмөлөһүөм диэн эрэннэрдэ. Вячеслав Анатольевич кинини бу кэмитиэккэ киирбитин  биһирээтэ.

“Томпо улууһа уруккуттан бырамыысыланнай оройуонунан биллэр. Сабаҕалааһын быһыытынан, манна тоннанан рудалаах көмүс, үрүҥ көмүс, вольфрам уонна хорҕолдьун, сибиниэс, цинк, уонунан миллиард тонна таас чох хараллан сытар”, — диэн Штыров бэлиэтээтэ. – Ол иһин Виктор Лебедевы бу кэмитиэккэ киллэрии олус сөптөөх. Ону сэргэ кини “Саханефтегазсбыт” генеральнай дириэктэрин солбуйааччынан үлэлиир”.

0
0
comments powered by HyperComments