Саха сирин бырабыыталыстыбатын бэрэссэдээтэлин э.т. Владимир Солодов Илиҥҥи экэнэмиичэскэй форумҥа Саха сирин ытык миэстэлэрэ киирбит Арассыыйаҕа бастакы Уһук Илин заповедниктарын ыйынньыгын сүрэхтээтэ.

“Заповедники Дальнего Востока. Современый путеводитель” кинигэни өрөспүүбүлүкэ бырабыыталыстыбатын бэрэссэдээтэлэ Владимир Солодов уонна Ураты харыстанар сирдэри сайыннарыы эйгэтин сүрүннээһиҥҥэ судаарыстыбаннай бэлиитикэтин департаменын уонна Арассыыйа Айылҕа харыстабылын Байкаллааҕы айылҕа сирин-уотун дириэктэрэ Алексей Титовскай Владивостокка Илиҥҥи экэнэмиичэскэй форум кэмигэр билиһиннэрдилэр.

Ураты ыйынньыгы оҥорор туһунан быһаарыыны былырыын ылыммыттара, кинигэ бүгүн атыыга бэлэм буолла. Владимир Солодов бэлиэтээбитин курдук, бу таһаарыыга биир да кэпиэйкэ судаарыстыба үбэ ороскуоттаммата.

Кини этэринэн ыйынньык үчүгэй хаачыстыбалаах уонна туһанарга табыгастаах.

“Арассыыйаҕа маннык кинигэ тахсыыта дьоһун хардыынан буолар, — диэн Саха сирин бырабыыталыстыбатын баһылыга бэлиэтээтэ. – Регион аатыттан эттэхпинэ, бу тиэмэни салгыы хамсатар баҕалаахпыт. Өрөспүүбүлүкэ үс гыммыт биирэ айылҕа ураты харыстанар сирин-уотун быһыытынан билиниллэр, биһиги “Өлүөнэ очуостара” аатырбыт пааркабыт соторутааҕыта Дмитрий Анатольевич Медведев быһаарыытынан федеральнай статуһу ылбыта. Онон биһиги экологическай туризмы биир сүрүн салаа быһыытынан оҥорор санаалаахпыт”.

Кинигэ ДФУо регионнарын 30 заповеднигын, национальнай уонна туристическай маршруттарын туһунан хас да салаалартан турар. Элбэх хаартыскалардаах уонна харыстанар сирдэр схемалара баар. Кинигэни таһаарыыга партнердарынан Кроноцкайдааҕы судаарыстыбаннай заповедник уонна “Экспоцентр “Заповедники России” тэрилтэ буоллулар.

Санаайа Иванова.

0
0
comments powered by HyperComments