29 Кулун тутар 29.03
  • -11°
  • $ 92,26
  • 99,71

Владимир Солодов: “Интеллектуальнай оонньууну аһыллыбытынан ааҕарга”!

Читайте нас на
Яндекс Новости
ЯДВ
Саха сирин историятыгар көмүс буукубанан суруллар I Интеллектуальнай оонньуулар үөрүүлээх арыллыыларыгар ыраахтан-чугастан үгүс оҕо, салайааччы, ыалдьыт муһунна.

Ол курдук, 18 дойдуттан киэҥ билиилээх, таһыччы көрүүлээх, күүстээх оҕолор өй күрэхтэһиитигэр холонуохтара. Бэйэтин тэлэгирээмэнэн эҕэрдэтигэр СӨ Ил Дарханын эбээһинэһин толорооччу Айсен Николаев Интеллектуальнай оонньуулары Саха Өрөспүүбүлүкэтэ көҕүлээбитинэн киэн туттарын уонна Дьокуускай маанылаах туонатыгар үөрэ көрсөрүн биллэрдэ. “Бүгүн аан дойду тэтимнээхтик уларыйар. Цифровой үйэ бары кыраныыссаны, ырааҕы уҥуордуур кыахтаах. Саҥа олох хайдах буолара эһигиттэн тутулуктаах. Туох даҕаны саарбаҕа суох эһиги бүттүүн планета уонна биһиги Арассыыйабыт инники элитата буолаҕыт”, — диэн тиэртэ. Бэйэлэрин ыллыктаах тылларын СӨ бырабыыталыстыбатын бэрэссэдээтэлин эбээһинэһин толорооччу Владимир Солодов, СӨ Судаарыстыбаннай сүбэһитэ, бастакы бэрэсидьиэнэ Михаил Николаев, Сингапур национальнай университетын бэрэпиэссэрэ, Азиа физикаҕа олимпиадатын бэрэсидьиэнэ, Интеллектуальнай оонньуулар бырагыраамаҕа кэмитиэтин бэрэссэдээтэлэ Леон Чуан Квек, РФ Федеральнай мунньаҕын наукаҕа, үөрэххэ уонна култуураҕа Сэбиэтин бэрэссэдээтэлин бастакы солбуйааччы Лилия Гумерова тиэртилэр. Маннык тэрээһиннэртэн талааннар чочуллан тахсаллар, Сингапур Саха сирин уонна Арассыыйаны кытта сибээһэ өссө күүһүрүөҕэ диэн Леон Чуан Квек эттэ. Оттон Владимир Солодов: Аан дойду уларыйар, чахчы глобальнай суолталанар. Биир эрэгийиэҥҥэ, биир дойдуга, оннооҕор биир континеҥҥа бүгэн олорон атыттары кытта күрэстэһэр кыахпыт суох”, — диэн бэлиэтээтэ. Санатан эттэххэ, Сингапур, Гонконг, Италия, Мексика курдук, о.д.а. уопсайа, 18 дойдуттан, өрөспүүбүлүкэттэн маҥнайгы Оонньууларга диэн ааттаан-суоллаан, 1000-тан тахса оҕо кытта сылдьар.

Людмила ПОПОВА, “Саха сирэ” хаһыат, edersaas.ru

Мария ВАСИЛЬЕВА (СИА) хаартыскаҕа түһэриилэрэ.

Следите за самым важным и интересным в Telegram-канале и WhatsApp-группе ЯСИА