Владимир Путин Уһук Илин федеральнай уокуругар төрөөһүнү элбэтиигэ эбии миэрэлэри ыларга сорудахтаата

Дойду Аҕа баһылыга Госсэбиэт мунньаҕын түмүгүнэн Арассыыйа Бырабыыталыстыбатыгар оҕо төрөөһүнүн иһин төлөбүрү үрдэтэргэ уонна Уһук Илин регионун олохтоохторугар ипэтиэкэ ставкатын аччатарга сорудахтаата.

Бу сыл ахсынньы 30 күнүгэр диэри Арассыыйа бырабыыталыстыбата Уһук Илиҥҥэ оҕо төрөөһүнүн элбэтиигэ эбии миэрэлэри ылыныахтаах, диэн СИА-ҕа Арассыыйа Илиҥҥи сайдыы министиэристибэтин пресс-сулууспатыттан иһитиннэрдилэр. Ол эбэтэр бастакы оҕо төрөөбүтүн иһин биир кэмнээх төлөбүр кээмэйин үрдэтэргэ, иккис оҕо төрөөтөҕүнэ дьиэ кэргэҥҥэ үбү биэрэргэ, үһүс уонна онтон элбэх оҕо төрөөтөҕүнэ бу регионнарга төрөөһүн коэффициенин билиҥҥи уопсай сууматыттан тутулуга суох төлөбүрдэри оҥорорго этилиннэ. Уһук Илин регионнарын олохтоохторугар үбү федеральнай бүддьүөттэн биэриэхтэрэ. Маны сэргэ бырабыыталыстыба оҕолоох ыалларга ипэтиэкэ (дьиэ-уот) кирэдьиитин ставкатын аччатыыны хааччыйыахтаах.

“Уһук Илин сүрүн баайа – дьон, Уһук Илин олохтоохторо. Нэһилиэнньэ ахсаанын элбэтии стратегическай соругунан буолар. Дьон суох буолллаҕына, ханнык даҕаны урутаан сайыннарыы наадата суох буолар. Бу туһугар ийэ буолууну уонна оҕо сааһы өйүөхпүт”, — диэн бэлиэтээтэ Арассыыйа Бырабыыталыстыбатын бэрэссэдээтэлин солбуйааччы – Уһук Илиҥҥэ Арассыыйа бэрэсидьиэнин боломуочуйалаах бэрэстэбиитэлэ Юрий Трутнев.

Бу иннинэ Юрий Трутнев Сахалин уобалаһын үтүө уопутун бэлиэтээбитэ, манна нэһилиэнньэ ахсаана элбээбитэ. Кини бу региоҥҥа оҕо төрөөһүнүн уонна дьиэни атыылаһыыга көдьүүстээх миэрэлэр олоххо киирбиттэрин бэлиэтээбитэ.

This post was published on 25.10.2018 18:30 18:30