Санатан эттэххэ, бэҕэһээ Кемеров куоракка Владимир Путин Оттук-энергетическэй комплекс уонна экологияҕа куттал суох буолуутун стратегиятын хамыыһыйатын мунньаҕын ыыппыта. Бу хамыыһыйаҕа “Транснефть”, “Росатом” курдук улахан хампаанньалар киирэллэр. Ону таһынан, туһааннаах министиэристибэлэр, биэдэмистибэлэр салайааччылара бааллар. Ону сэргэ мунньахха Ил Дархан э.т. Айсен Николаев сырытта. Мунньахха ньиэп эйгэтигэр нолуокка уларытыылары киллэрии, таас чоҕу хостооһун, туһаҕа таһаарыы, тас дойду ырыынагар атыылааһын боппуруостарын дьүүллэстилэр.
Кэлэр сылларга Россия таас чоҕу тас дойдуга атыылыыр кээмэйин элбэтиэхтээх. Ол иһигэр Азия, Тиихэй акыйаан кыйа сытар дойдуларга эмиэ. Ол иһин дойду бэрэсидьиэнэ таас чоҕу хостуур сүрүн эрэгийиэннэргэ үлэ өссө тэтимириэхтээҕин эттэ. “Билигин аан дойдуга Россия таас чоҕунан тахсарыгар, ырыынакка бэйэтин миэстэтин булунарыгар тоҕоостоох кэм. Онуоха кыахпыт баар. Бу кыахпытын туһанарбытыгар хас да соругу туруорунан, ону толоруохпутун наада. Ол иһигэр уруккуттан таас чоҕунан дьарыктанар эрэгийиэннэргэ, Кузбасска, Хакасияҕа, Саха сиригэр, онтон да атын саҥа сирдэргэ (Илин Сибииргэ, Уһук Илиҥҥэ) чох промышленноһыгар саҥа ньымалары киллэрэн, куттала суох үлэни тэрийэн сайыннарыахпытын наада”, — диэн бэлиэтиир кини.
Владимир Путин этэринэн, билигин таас чоҕу атыылаһыан баҕалаах саҥа дойдуларга тахсар, ыырбытын кэҥэтэр сөп. Манна Азия, Тиихэй акыйаан кыйа олорор дойдулар улахан оруолу ылыахтаахтар. Онуоха Россия бэйэтин кыаҕын, уратытын толору туһаныахтаах.
Аграфена КУЗЬМИНА, “Саха сирэ” хаһыат.
